Польша Будапештдаги элчисини чақириб олиб, Венгрия билан дипломатик муносабатларни қисқартирмоқда. Бу ҳақда Anadolu хабар берди.
Польша нашрларининг хабар беришича, мамлакат Ташқи ишлар вазирлиги қарори билан Будапештдаги элчи Себастьян Кенчек 15 июлдан ўз вазифаларини бажаришни тўхтатган. Вазирлик матбуот котиби Павел Вронский элчининг чақириб олинишини қуйидагича изоҳлади:
“Европа Иттифоқининг ўзаро содиқлик тамойилига зид равишда Венгрия молиявий ва жиноий жавобгарликка тортилган собиқ адлия вазири ўринбосари Марсин Романовскийга сиёсий бошпана берган”.
Вронски вазиятга изоҳ берар экан, кейинги қадамлар ҳақида прогноз беришдан бош тортган.
Венгриянинг жавоби
Венгрия ташқи ишлар ва савдо вазири Петер Сийярто Будапешт Польша билан мустаҳкам алоқаларга интилишини таъкидлаган. Аммо Варшавадаги ҳукумат бундан манфаатдор эмаслиги айтилган. Сийяртога кўра, Венгрия Польша элчиларига ҳар доим ҳурмат билан муносабатда бўлган.
“Улар уруш тарафдори бўлган ҳукумат, биз эса тинчлик тарафдоримиз. Бироқ бу ҳамкорлик қилишга тўсқинлик қилмаслиги керак”, деган вазир.
Польша прокуратураси 2019—2023 йилларда мамлакат адлия вазири ўринбосари лавозимида ишлаган Марсин Романовскийга нисбатан бир қатор айбловларни илгари сурганди. Жумладан, у “уюшган жиноий гуруҳ билан тил бириктириш” ва “давлат маблағларини ўзлаштиришга уриниш”да айбланган.
Романовский бу айбловларни рад этиб, 2024 йил декабрь ойида Венгриядан сиёсий бошпана сўраб мурожаат қилган. Венгрия ҳукумати эса унинг илтимосини қондирган. Оқибатда ушбу ҳодиса икки давлат ўртасидаги муносабатларда кескинликни келтириб чиқарган.
Изоҳ (0)