Turkiyaning deportatsiya markazlarida bo‘lib turgan o‘zbekistonlik 50 nafar ayol vatanga qaytarildi, deb xabar bermoqda Migratsiya agentligi matbuot xizmati.
Ma’lum qilinishicha, agentlik hamda Turkiya Mehnat va ijtimoiy himoya vazirligi mas’ullari o‘rtasida Turkiyada noqonuniy maqomda bo‘lib turgan fuqarolarni legallashtirish bo‘yida muzokaralar o‘tkazildi. Uning natijasida ushbu mamlakatda noqonuniy maqomda bo‘lib turgan o‘zbekistonliklarni ma’muriy jazosiz ro‘yxatdan o‘tkazish, yashash va ishlash ruxsatnomalarini berish (legallashtirish) taklifi Turkiya rasmiylari tomonidan ma’qullandi.
Qariyalar va bolalarni parvarishlash, qishloq xo‘jaligi sohalarida noqonuniy faoliyat yuritayotgan o‘zbekistonliklar huquqiy maqom berishga kelishildi.
Shuningdek, Turkiya deportatsiya markazlaridagi 50 nafar ayolga vatanga qaytish uchun Migratsiya jamg‘armasi hisobidan aviachiptalar xarid qilindi. 28 nafariga “vatanga qaytish guvohnomasi” rasmiylashtirilib, repatriatsiya jarayoni boshlandi.
O‘zbekiston va Turkiya hukumatlari o‘rtasida “Ijtimoiy himoya to‘g‘risida”gi yangi bitim ishlab chiqishga kelishildi.
Migratsiya agentligi barcha fuqarolarni Turkiyada qonuniy ishlashga chaqirdi. Ushbu davlatda nolegal maqomda bo‘lgan O‘zbekiston fuqarolarini legallashtirish uchun migratsiya boshqarmasiga murojaat qilishi lozim.
O‘zbekiston fuqarosi Turkiyada legallashishi uchun quyidagi shartlar bajarilishi kerak:
- yaroqlilik muddati 1 yildan kam bo‘lmagan xorijga chiqish biometrik pasportiga ega bo‘lish;
- ish beruvchi mahalliy notarial idoralari orqali kafolat xati taqdim etishi (ya’ni xorijiy fuqaroni ish bilan ta’minlashini kafolatlash);
- ish beruvchining oylik daromadi 132 000 turk lirasidan kam bo‘lmasligi;
- xorijiy fuqaro ilgari deportatsiya markazlariga vaqtinchalik nazorat ostiga olinmagan bo‘lishi;
- xorijiy fuqaro uchun Turkiyaga kirish taqiqi bo‘lmasligi;
- muqaddam sudlanmagan bo‘lishi.
Yuqoridagi talablarga mos keluvchi xorijiy fuqarolarning huquqiy holatini legallashtirish uchun dastlab ish beruvchi mahalliy migratsiya boshqarmasiga murojaat qilib, xorijiy fuqaro o‘ziga tegishli xonadonda yashashini bildirib, uning hayoti, sog‘ligi, yashash guvohnomasi yoki ish ruxsatnomasi muddati tugaganidan so‘ng o‘z vataniga qaytarish kabi majburiyatlarni o‘z ichiga olgan kafolat xatini (taahhütnoma) taqdim etadi.
Migratsiya boshqarmalari tomonidan ushbu xorijiy fuqaro nomiga 6 oylik vaqtinchalik yashash guvohnomasi (ikamet izni) rasmiylashtirib beriladi. Shundan so‘ng eng kechi 4 oy ichida bu vaqtinchalik guvohnomani ishlash ruxsatnomasiga almashtirish uchun murojaat qilinishi zarur.
Turkiya Ichki ishlar vazirligi ma’lumotlariga ko‘ra, mamlakatda yashash uchun ruxsatnomaga ega o‘zbeklar soni 2025-yil 26-iyun holatiga ko‘ra, 57 952 kishini tashkil etmoqda.
Izoh (0)