Kuba mehnat va ijtimoiy ta’minot vaziri Marta Yelena Feito Kabrera mamlakatda tilanchilar yo‘qligini, faqat o‘zini tilanchidek ko‘rsatayotgan odamlar borligini aytgani sabab iste’foga chiqdi. Bu haqda Al Jazeera xabar berdi.
Mamlakat hukumati 16-iyul kuni ijtimoiy tarmoqqa joylangan postda Feito xolislik va sezgirlikning yetishmasligi tufayli o‘z xatolarini tan olgani va iste’foga chiqishga ariza berganini ma’lum qilgan.
Feito Milliy assambleya qo‘mitasida deputatlarga davlatdagi qashshoqlik haqida nutq so‘zlaganda quyidagi fikrlarini aytgandi.
“Tilanchilarga e’tibor berganmisiz? Aftidan tilanchiga o‘xshaydi. Lekin ularning qo‘llari va kiygan kiyimlariga qarasangiz, aslo unday emas. Ular gadoy qiyofasida, xolos, haqiqiy tilanchi emas. Kubada gadoylar yo‘q”, degan edi Feito.
Sobiq vazirning qo‘shimcha qilishicha, avtomobil oynalarini tozalovchilar oson hayot kechiradi va topgan pullarini spirtli ichimliklar ichishga sarflaydi. U, shuningdek, axlat tituvchilarni tanqid qilib, ular mahsulotlarni qayta sotish va soliq to‘lamaslik uchun ishlayotganini aytgan.
Vazirning bu gaplari tezda ommalashib, so‘nggi yillarda og‘ir iqtisodiy vaziyatni boshdan kechirayotgan mamlakatda Feitoni impichmentga undagan. Hatto Kuba prezidenti Migel Dias-Kanel ham uni tanqid qilgan.
“Zaiflikni bartaraf etishda obyektivlikning yo‘qligi achinarli. Revolyutsiya hech kimni ortda qoldirolmaydi. Bizning shiorimiz va jangovar mas’uliyatimiz ana shundan iborat”, degan prezident.
Kuba bugungi kunda og‘ir iqtisodiy inqirozni boshdan kechirmoqda. Bu qiyinchiliklarga COVID-19 pandemiyasi, AQSH sanksiyalari va iqtisodiyotni noto‘g‘ri boshqarish sabab bo‘lmoqda.
Oziq-ovqat, dori-darmon va boshqa zarur mahsulotlarning tanqisligi qashshoqlikka yo‘l ochgan. Mamlakatdagi yuqori inflyatsiya xaridni kamaytirib yuborgan. Bu esa odamlarning asosiy ehtiyojlarini qoplashni qiyinlashtirgan. Ekspertlarning fikricha, Kubada iqtisodiy islohotlarning yo‘qligi va eskirgan iqtisodiy modelga tayanish vaziyatni yanada og‘irlashtirmoqda.
Izoh (0)