Ulug‘bek Lapasov O‘zbekistonning Kubadagi elchisi etib tayinlandi. Bu haqda “Dunyo” axborot agentligi xabar berdi.
20-noyabr kuni u Kuba prezidenti Migel Mario Dias-Kanel Bermudesga ishonch yorliqlarini topshirdi. Suhbat chog‘ida Migel Bermudes Kuba O‘zbekiston bilan do‘stlik, o‘zaro hurmat va manfaatlarni hisobga olish tamoyillariga asoslangan munosabatlarni qadrlashini ta’kidlagan. Shuningdek, Kuba hukumatining Toshkent bilan siyosiy muloqotni faollashtirish va ko‘p qirrali hamkorlikni mustahkamlashdan yuqori manfaatdorligini qayd etgan.
Ulug‘bek Lapasov 2023-yil avgustidan buyon O‘zbekistonning BMTdagi doimiy vakili sifatida ishlab kelmoqda. Undan avval O‘zbekistonning Jenevadagi bo‘linmasi va boshqa xalqaro tashkilotlardagi O‘zbekistonning doimiy vakili bo‘lgan.
O‘zbekiston—Kuba munosabatlari
Mamlakatlar o‘rtasidagi diplomatik munosabatlar 2006-yil 13-martda o‘rnatilgan. Tegishli qo‘shma deklaratsiya Toshkentda imzolangan. Kuba O‘zbekistonning Vashingtondagi (AQSH) elchixonasi konsullik okrugi tarkibiga kiradi. 2024-yilning fevralida Kubaning O‘zbekistondagi elchisi etib tayinlangan Karlos Valdes de la Konsepsyon O‘zbekiston TIV rahbari Baxtiyor Saidovga ishonch yorliqlari nusxalarini topshirgandi.
Izoh (0)