Buyuk Britaniyaning eng yirik BAE Systems mudofaa kompaniyasi to‘rtinchi avlod Eurofighter Typhoon qiruvchi samolyotlarini ishlab chiqarishni to‘xtatdi. Bu haqda Financial Times xabar berdi.
Mazkur qarorga sabab sifatida yangi buyurtmachilarning yo‘qligi ko‘rsatilmoqda. Hozirda kompaniyaning Uortondagi zavodi 2017-yilda tuzilgan 5 milliard funt sterlinglik (taxminan 260 million dollar) shartnoma asosida Qatarga so‘nggi samolyotni yetkazib berishga tayyorgarlik ko‘rmoqda.
Zavod angarida hozirda atigi bitta qiruvchi samolyot qolgan. U to‘liq jihozlanish va bo‘yalishni kutmoqda. Asosiy yig‘ish liniyasi esa to‘xtatilgan — u yerda ishchilar qolmagan, deydi Unite kasaba uyushmasi vakili.
Buyuk Britaniya hukumati 2009-yildan beri yangi Eurofighter Typhoon samolyotlariga buyurtma bermagan. Buning o‘rniga u AQSHning F-35 qiruvchilarini xarid qilishga qaror qilgan. Saudiya Arabistoni, Qatar va Turkiya bilan yangi eksport shartnomalari esa hali imzolanmagan.
Yaqin kelajakda buyurtmalarning yo‘qligi BAE Systems uchun Buyuk Britaniyaning Global jangovar aviatsiya dasturi (GCAP) doirasida yangi avlod qiruvchi samolyotlarini yaratish imkoniyatlariga putur yetkazishi mumkin. Bu borada parlament a’zolari xavotir bildirmoqda.
Biz jahon darajasidagi harbiy samolyotlarni mustaqil ravishda loyihalash, yig‘ish va yetkazib berish bo‘yicha muhim milliy salohiyatni yo‘qotish xavfi ostidamiz, dedi konservativ deputat Endryu Snouden.
Men vazirlarga bir necha bor aytdim: agar biz o‘z qiruvchilarimizni yig‘ishni to‘xtatsak, ish o‘rinlari, malakalar va milliy xavfsizlik jiddiy tahdid ostida qoladi, deya ta’kidladi Unite kasaba uyushmasining bosh kotibi Sheron Grem.
Eurofighter Typhoon — bu BAE Systems, Airbus va Leonardo kompaniyalaridan iborat Yevropa konsorsiumi tomonidan ishlab chiqilgan qiruvchi samolyot. Har bir kompaniya samolyotning ayrim qismlarini ishlab chiqaradi hamda o‘z zavodlarida yakuniy yig‘ishni amalga oshiradi. Hozirda BAE Systems Salsberidagi zavodda boshqa davlatlar uchun buyurtma asosida old fyuzelyajlarni ishlab chiqarishni davom ettirmoqda.
Buyuk Britaniya o‘zidagi mavjud Typhoon samolyotlarini, jumladan yangi radarlar bilan modernizatsiya qilishga va’da bergan bo‘lsa-da, konsorsiumning eng so‘nggi modeliga hali buyurtma bermagan.
Mudofaa vaziri Jon Xili o‘tgan hafta ushbu mavzudagi savollarga aniq javob bermagan. Biroq, u mazkur qiruvchilarning muhimligini tasdiqlagan va ular “hech bo‘lmaganda 2040-yillargacha” Buyuk Britaniya osmonini himoya qilishda asosiy rol o‘ynashda davom etishini aytgan.
Izoh (0)