Isroil bosh vaziri Binyamin Netanyaxu Eron oliy rahnamosi Xomanaiyning o‘ldirilishi mamlakat bilan ziddiyatga chek qo‘yishini aytdi. Bu haqda Deutsche Welle xabar berdi.
Netanyaxuning aytishicha, Islom respublikasi “Yaqin Sharqdagi barchaga dahshat solmoqda va dunyoni yadro urushi yoqasiga olib kelmoqda”. Isroil esa “yovuzlik kuchlariga qarshi turish orqali bu tajovuzga chek qo‘yish niyatida”.
“Agar Eronning oliy rahnamosi Oyatulloh Ali Xomanaiy o‘ldirilsa, bu Islom Respublikasi va Isroil o‘rtasidagi mojaroni kuchaytirmaydi, balki mojaroga chek qo‘yadi”, dedi Isroil bosh vaziri Binyamin Netanyaxu 16-iyun kuni.
“Bizning oramizda Yaqin Sharqdagi barchani dahshatga solayotgan yarim asrlik mojaro bor. U Saudiya Arabistonidagi Aramco neft konlarini bombardimon qildi; u hamma joyda terrorizm, qo‘poruvchilik va sabotaj tarqatmoqda. Eron abadiy urushni istaydi, bu bizni yadro urushi yoqasiga olib keladi. Aslida, Isroil bunga yo‘l qo‘ymayapti, bu tajovuzga chek qo‘ymoqda va biz buni faqat yovuz kuchlarga qarshi turish orqali amalga oshirishimiz mumkin”, deya qo‘shimcha qilgan Netanyaxu.
Isroil haqiqatan ham Xomanaiyni nishonga oladimi, degan savolga Netanyaxu mamlakat “qilish kerak bo‘lgan ishni qilayotgani”ni aytgan.
Oldinroq, AQSH prezidenti Donald Tramp Isroilning Xomanaiyni yo‘q qilish rejasiga veto qo‘ygandi. Eron Amerika fuqarolariga to‘g‘ridan to‘g‘ri hujum qilmaguncha, Vashington bunday choralarni ma’qullashga tayyor emasligi bildirilgan. Isroil Milliy xavfsizlik kengashi rahbari Szaxi Hanegbi bu xabarni “soxta xabarlar mamlakatidan kelgan uydirma” deb atagan.
Ta’kidlanishicha, Xomanaiy Isroil harbiy amaliyoti boshlanganidan bir necha soat o‘tgach, Tehron shimoli-sharqidagi yerosti bunkeriga yashiringan. Boshpanada Eron oliy rahbari bilan birga uning oila a’zolari ham bor. Isroilga qarshi avvalgi operatsiyalar paytida — 2024-yil aprel va oktyabr oylarida ham Oyatulloh ushbu bunkerga yashiringandi.
Isroil 15-iyun kuni Xomanaiy o‘zini hech qayerda xavfsiz his qila olmasligini ko‘rsatish uchun yahudiy davlatidan 2300 km uzoqlikdagi Mashhad aeroportiga zarba bergan. Oliy rahnamo devoni rahbari o‘rinbosari Ali Asg‘ar Hijoziy Rossiya rasmiylari bilan vaziyat yanada yomonlashsa, mamlakatni tark etish ehtimoli haqida maxfiy muzokaralar olib borayotgani aytilgan. Aytilishicha, Eronning boshqa yuqori martabali amaldorlari ham xuddi shunday kelishuvlarga erishmoqda.
Izoh (0)