Buyuk Britaniya O‘zbekistonda empatiyaga doir bolalar uchun ijtimoiy taʼlim dasturlarini amalga oshirmoqchi. Bu haqda “Dunyo” AA xabar berdi.
Maʼlum qilinishicha, O‘zbekiston elchixonasida Britaniyaning Think Equal tashkiloti asoschisi va direktori Lesli Udvin bilan uchrashuv bo‘lib o‘tdi. Uchrashuv avvalida Lesli Udvin Think Equal tashkilotining faoliyati va taʼlim dasturlari to‘g‘risida batafsil aytib berdi.
Uning aytishicha, dasturlar bolalarda empatiya va hissiy savodxonlik, o‘z-o‘zini boshqarish, tanqidiy fikrlash va muammolarni oqilona hal etish, kelishmovchiliklarni tinch yo‘l bilan hal qilish va boshqa muhim qobiliyatlarni rivojlantirishga qaratilgan.
O‘quv dasturlar 30 haftalik bo‘lib, har haftada 3 marta 30 daqiqalik darslarni o‘z ichiga oladi. Darslar maxsus illyustratsiyalangan kitoblar, qo‘llanmalar va o‘yinlar orqali o‘tkaziladi.
Muzokara yakunida Think Equal bilan O‘zbekiston Maktabgacha va maktab taʼlimi vazirligi o‘rtasida hamkorlikni yo‘lga qo‘yish bo‘yicha alohida uchrashuv tashkil etish taklifi qo‘llab-quvvatlandi.
Think Equal tashkiloti 3 yoshdan 6 yoshgacha bo‘lgan bolalar uchun ijtimoiy-emotsional taʼlim dasturlarini amalga oshiradi. Dasturlar ayni vaqtda Hindiston, Keniya, Kanada, Avstraliya Janubiy Afrika, Meksika, Singapur, Buyuk Britaniya va boshqa mamlakatlarning maktabgacha taʼlim muassasalarida hamda maktablarida hamkorlik asosida yo‘lga qo‘yilgan.
Buyuk britaniyalik 500 dan ortiq o‘qituvchi O‘zbekistondagi maktablarga keladi. Buyuk Britaniyada ta’lim sohasida faoliyat yurituvchi hamkorlar bilan ikki tomonlama uchrashuvlar ham tashkil etildi. Tadbir doirasida, VSO (Volunteyers Servicyes Overseas) tashkiloti bilan ikki tomonlama hamkorlik kelishuvi imzolandi.
Bundan tashqari, O‘zbekiston va Buyuk Britaniya tashqi siyosat idoralari o‘rtasida 2025—2026-yillarga mo‘ljallangan hamkorlik dasturi imzolangan edi. Buyuk Britaniya O‘zbekistonning Jahon savdo tashkilotiga a’zo bo‘lish jarayonini to‘liq qo‘llab-quvvatlashini tasdiqlagan edi. Shuningdek, Buyuk Britaniya konsorsiumi O‘zbekistonda transport va energetika sohalaridagi loyihalarni amalga oshirishi xabar qilingandi.
Izoh (0)