29-noyabr kuni soat 9:30 da Afgʻonistonning Kam Air aviakompaniyasi samolyoti Toshkent xalqaro aeroportiga kelib qo‘ndi. Bu haqda “O‘zbekiston havo yo‘llari” MAK axborot xizmati xabar bermoqda.
“Afgʻoniston bizga qoʻshni doʻst davlat, fuqaro aviatsiyasi bu ikki davlat oʻrtasidagi ikki tomonlama munosabatlarni rivojlantiruvchi katalizator, ikkala mamlakat madaniyati va iqtisodini bogʻlovchi koʻprik vazifasini oʻtaydi.
Agar ilgari afg‘onistonlik yo‘lovchilar Toshkentga Istanbul yoki Dubay orqali, 17 dan 32 soatgacha vaqt sarflab uchib kelishgan boʻlsa, endilikda atigi bir yarim soatda toʻgʻridan toʻgʻri Kobuldan Toshkentga uchib kelish imkoniyati paydo boʻldi.
Islom Karimov nomidagi Toshkent xalqaro aeroporti Kam Air aviakompaniyasi yoʻlovchilari uchun Germaniya, Buyuk Britaniya va Yevropaning boshqa davlatlariga uchadigan qatnovlarda parvoz qilishlari uchun tutashtiruvchi aeroport vazifasini oʻtaydi”, — deyiladi xabarda.
Bundan tashqari, afgʻonistonlik uchuvchilarni Oʻzbekiston Milliy aviakompaniyasining uchuvchilar maktabida oʻqitish, shuningdek Uzbekistan Airways Technics aviakorxonasida Kam Air havo kemalariga texnik xizmat koʻrsatish yuzasidan xalqaro kelishuvlar ham imzolandi.
Birinchi qatnovni amalga oshirishdan oldin idoralararo oʻzbek-afgʻon ishchi guruhi katta hajmdagi dastlabki tayyorgarlik ishlarini amalga oshirdi, xususan xavfsizlikni ta’minlash masalalari joyida oʻrganildi. Hamid Karzay nomidagi Kobul xalqaro aeroportida yoʻlovchilarni havo kemasiga chiqarish tartib-taomillari xavfsizlik boʻyicha barcha xalqaro aviatsiya talablariga javob beradi.
Bizning aviakompaniya ikkala poytaxt shahar oʻrtasida aviayoʻnalish ochgan Afgʻonistonning birinchi xususiy aviakompaniyasi boʻlganligi bilan faxrlanamiz. Kam Air – Afgʻonistonning oʻsayotgan aviakompaniyasi, unda yuqori darajadagi oʻz kasbining haqiqiy ustalari ishlashadi. Biz “Oʻzbekiston havo yoʻllari” singari ishonchli va texnik jihozlangan shunday aviakompaniya bilan hamkorlik qilayotganimizdan gʻururdamiz. Afgʻoniston va Oʻzbekiston oʻrtasida aviaqatnovlarning tiklanishi bu kompaniyaning parvozlar geografiyasini kengaytirish boʻyicha strategiyasining bir qismidir.Zamari Kamgar, Kamgar Group egasi va asoschisi, afgʻon biznesmeni
Ma’lumot uchun, Afgʻonistondagi Hamid Karzay nomidagi Kobul xalqaro aeroportida joylashgan Kam Air aviakompaniyasi 2003-yilda tashkil etilgan. Kam Air muntazam qatnovlarni amalga oshiradigan portlar sirasiga Dehli, Mashhad, Tehron, Dushanbe, Istanbul va Jidda kiradi.
Izoh (0)