Turkiya va Suriya xalqaro avtomobil qatnovlarini tiklovchi yangi memorandum imzoladi. Bu haqda Anadolu xabar berdi.
Memorandum ikki davlat o‘rtasida to‘g‘ridan-to‘g‘ri quruqlik qatnovlarini tiklashga yo‘l ochadi. Turkiya transport va infratuzilma vaziri Abdulqodir O‘rolo‘g‘li kelishuv 2004-yilda ikki davlat o‘rtasida tuzilgan “Xalqaro avtomobil transporti shartnomasi”ni qayta tiklashini aytgan.
Endilikda yuk mashinalari tovarlarni boshqa transport vositasiga o‘tkazmasdan chegarani kesib o‘tadi. Bu esa savdo-sotiqni tezroq, osonroq va arzonroq qiladi.
“Chegara o‘tish joylarida kargo tugatiladi. Bu yuklarni qayta yuklash zaruratisiz to‘g‘ridan-to‘g‘ri Turkiya va Suriya o‘rtasida tashish imkonini beradi”, dedi vazir.
Ikki davlat Turkiyadan Iordaniya, Saudiya Arabistoni, Birlashgan Arab Amirliklari, Qatar va Fors ko‘rfazining boshqa mamlakatlariga to‘g‘ridan-to‘g‘ri tranzit tashuvlarini amalga oshirmoqchi. Turkiya hamda Suriya rasmiylari yo‘lovchi va yuk tashishning turli yo‘nalishlarida hamkorlik qilib, o‘zaro o‘quv dasturlari o‘tkazishni rejalashtirgan.
“Turkiya va Suriya o‘rtasidagi transportning qayta tiklanishi ikki davlatning Yevropa va Osiyo o‘rtasidagi mintaqaviy savdodagi mavqeyini mustahkamlaydi. Shuningdek, u Transkaspiy xalqaro transport yo‘lagini Fors ko‘rfazi davlatlari bilan integratsiya qilishga yordam beradi”, deb qo‘shimcha qildi vazir.
Suriyada 2024-yil dekabrda Asad rejimi qulaganidan so‘ng, o‘tish davri hukumati mintaqaviy qo‘shnilar va boshqa davlatlar bilan mustahkam aloqalarni o‘rnatishga harakat qilmoqda.
Izoh (0)