Turkiya harbiylari 7-may kuni Suriya shimolida Kurdiston ishchi partiyasiga aloqador 4 nafar jangarini yo‘q qilgan. Bu haqda Anadolu nashri xabar berdi.
Voqea haqida dastlab Turkiya Milliy mudofaa vazirligi xabar bergan. “Furot qalqoni” maxsus operatsiya zonasiga kirib kelgan jangarilar tezkor qarshi hujumda yo‘q qilingan.
Turkiya xavfsizlik kuchlari dastlab Suriya shimolida, Turkiya chegarasiga yaqin hududda to‘rt nafar jangari aniqlangani haqida xabar tarqatgan. Ushbu xabarga asosan harbiy qo‘mondonlik aksilterror hujumga ruxsat bergan.
Maʼlumot o‘rnida, Kurdiston ishchi partiyasi Turkiya, AQSH va Yevropa Ittifoqida rasman terrorchi tashkilotlar ro‘yxatiga kiritilgan. Partiya 40 yildan ortiq davom etgan terror kampaniyasida 40 000 nafardan ortiq odam, jumladan, ayollar, bolalar va go‘daklar o‘limiga sababchi bo‘lgan.
Anqara 2016-yildan beri Suriya shimolidagi chegarasi bo‘ylab terrorchilar koridori shakllanishiga yo‘l qo‘ymaslik va aholining o‘z turar-joylariga tinch yo‘l bilan qaytishini taʼminlash maqsadida uchlik aksilterror amaliyotlarini amalga oshirib keladi. “Furot qalqoni” (2016), “Zaytun novdasi” (2018), va “Tinchlik bahori” (2019) operatsiyalari hozirda ham davom etayotgani xabar qilingan.
Izoh (0)