Ijtimoiy tarmoqlarda fuqaro ichki ishlar organlari xodimiga qarshilik ko‘rsatayotgani aks etgan video tarqalib, turli muhokamalarga sabab bo‘lmoqda. Mazkur holat yuzasidan IIBB ma’lumot berdi.
Unga ko‘ra, 21-iyun kuni soat 14.30 larda Uchtepa tumani, 31-mavzesi hududida ikki nafar fuqaro tortishib qolgan va tomonlar o‘zaro janjallashib ketgan. Janjal vaqtida fuqaro U.M. o‘tkir tig‘li jism bilan fuqaro N.T.ga tan jarohati yetkazgan hamda hodisa joyidan yashiringan. Natijada jabrlanuvchi chap ko‘krak qismining sanchilgan-kesilgan jarohati tashxisi bilan shifoxonaga joylashtirilgan.
Hodisa joyiga yetib kelgan hududiy profilaktika inspektori O.Abdullayev mazkur jinoyatni sodir etgan shaxsni ushlash choralarini ko‘rgan vaqtida, U.M. unga ham pichoq bilan tajovuz qilib, faol qarshilik ko‘rsatgan.
Ko‘rilgan chora-tadbirlar natijasida gumonlanuvchi daliliy ashyo (N.T.ga tan jarohati yetkazgan pichoq) bilan profilaktika inspektori va PPX xodimlari tomonidan qo‘lga olingan hamda tergovga jalb qilingan.
IIO xodimlari tan jarohati olmagan. Mazkur holat yuzasidan Uchtepa tumani IIO FMB huzuridagi Tergov bo‘limi tomonidan Jinoyat kodeksining 105-moddasi 2-qismi “m” bandi (qasddan badanga o‘rtacha og‘ir shikast yetkazish qurolni yoki sovuq qurol sifatida foydalanilishi mumkin bo‘lgan ashyolarni ishlatib sodir etilgan bo‘lsa) bilan jinoyat ishi qo‘zg‘atilib, dastlabki tergov harakatlari olib borilmoqda.
Tergov yakuni bo‘yicha qonuniy qaror qabul qilinishi ta’minlanadi.
Toshkent viloyatining Chinoz tumanida 17 yoshli yigit o‘zining sinfdoshi tomonidan pichoqlangani, Shahrisabzda esa sobiq IIB xodimi qishloqdoshi tomonidan pichoqlab o‘ldirilgani xabar berilgandi.
Shuningdek, Qashqadaryo viloyatining Kitob tumanida hokim yordamchisi pichoqlab, o‘ldirilgani xabar qilingan.
Izoh (0)