Respublika shoshilinch tez yordam ilmiy markazi Andijon filialida fuqaro shifokorlarga pichoq bilan tajovuz qilgani haqida xabar berilgan edi. Bosh prokuratura matbuot xizmatining xabar berishicha, ushbu fuqaroga nisbatan jinoyat ishi qo‘zg‘atilib, tergov harakatlari olib borilmoqda.
Sog‘liqni saqlash vazirligi matbuot xizmatining xabar berishicha, ushbu voqea 29-fevral kuni yuz bergan.
Qayd etilishicha, respublika shoshilinch tibbiy yordam ilmiy markazi Andijon filialining Travmatologiya bo‘limi qabulxonasiga 2001-yilda tug‘ilgan M.F. ismli ayol bemor yuz-ko‘zidan jarohat olib murojaat qilgan. Bemor shifokorlar ko‘rigidan o‘tayotganda turmush o‘rtog‘i tomonidan kaltaklanganini aytgan.
“O‘rnatilgan tartibga ko‘ra, o‘zgalar tomonidan jarohat olgan holat mavjud bo‘lsa, tibbiyot xodimi huquqni muhofaza qilish organlariga tezkor xabar berishi shart. Aks holda jinoyat yashirganlik holati bilan javobgarlik tortilishi mumkin. Shunga muvofiq, shifokor T.U. zudlik bilan mazkur holat yuzasidan Ichki ishlar bo‘limiga xabar beradi”, — deyiladi xabarda.
Xabar berilganligidan norozi bo‘lgan bemor ayolning egizak ukasi M.X. ismli shaxs e’tiroz bildiradi. Shifokor unga o‘rnatilgan tartibni tushuntirgandan so‘ng, bemorning ukasi shifokorni uyatli so‘zlar bilan haqorat qila boshlaydi. Shifokor unga so‘kinmasligini aytadi. Ular orasida tortishuv M.X.ning pichoq orqali shifokorga tajovuz tahdidi bilan davom etadi. Atrofidagi bir nechta odamlar M.X.ni agressiv holatdan qaytarishga urinadi. Ammo u harakatlarini davom ettirib, pichoqni shifokor tomonga otib yuboradi. Biroq ushbu pichoq atrofdagi boshqa shaxsga tegadi. Bemor yaqinlari va atrofdagi boshqa shaxslar tomonidan M.X majburan tinchlantirilib, qabulxonadan olib chiqib ketiladi.
Eri tomonidan kaltaklangan ayol M.F. esa “Bosh miya yopiq jarohati, bosh miya chayqalishi, jag‘ suyaklari sinishi, yonoq, bosh, yuz, qorin, oyoq va qo‘llar yumshoq to‘qimalari jarohati” tashxisi bilan mazkur filialning neyroxirurgiya bo‘limida joriy yil 4-mart kuniga qadar davo muolajalarini oladi.
Mazkur holat yuzasidan Andijon shahar prokuraturasi tomonidan 10-mart kuni Jinoyat kodeksining 219-moddasi (Hokimiyat vakiliga yoki fuqaroviy burchini bajarayotgan shaxsga qarshilik ko‘rsatish) bilan jinoyat ishi qo‘zg‘atilgan va fuqaro M.X. protsessual tartibida ushlangan.
Izoh (0)