Toshkentning Olmazor tumanida xizmat vazifasini bajarayotgan profilaktika inspektori o‘ldirib ketilgandi. “Daryo” muxbirining ma’lum qilishicha, IIV departamet boshlig‘i o‘rinbosari Hamza Mahsumov holat yuzasidan qo‘shimcha ma’lumot berdi.
“Xodim pichoqlanib o‘ldirilgan. Ayol kishi inspektorga telefon qilib, ‘Erim meni o‘ldirmoqchi’, deb aytgan. Voqea joyiga inspektor borgan vaqtda ayolning eri xodimga ikki marta pichoq urgan”, — degan Hamza Mahsumov.
Voqea 30-noyabr kuni soat 00:50 larda yuz bergandi. Olmazor tumani IIO Faoliyatini muvofiqlashtirish bo‘limi profilaktika inspektori katta leytenant N.Bobomurotov tumanning “G‘alaba” mahallasiga tezkor chaqiruv bo‘yicha yetib borib, xizmat vazifasini bajarayotgan vaqtida, muqaddam sudlangan, 1992-yilda tug‘ilgan fuqaro B.Z. xodimning hayotiga tajovuz qilib, voqea joyidan yashiringan.
Olib borilgan tezkor-qidiruv tadbirlari natijasida IIB profilaktika inspektori hayotiga tajovuz qilgan fuqaro qo‘lga olinib, protsessual tartibda chora ko‘rish uchun prokuratura organlariga topshirildi.
Holat yuzasidan Toshkent shahar prokuraturasi tomonidan Jinoyat kodeksining 97-moddasi (qasddan odam o‘ldirish) bilan jinoyat ishi qo‘zg‘atilgan.
Izoh (0)