Kuni kecha “Muhtasham yuz yil” serialidagi sulton Sulaymon roli bilan tanilgan Halit Ergench Istanbuldagi Gezi parkida bo‘lib o‘tgan norozilik namoyishlari bilan bog‘liq voqealarni tergov qilish vaqtida yolg‘on ko‘rsatma berganlikda ayblanib, bir yil-u o‘n yarim oy qamoq jazosiga hukm qilindi.
Biroq aktyorning avvalroq sudlanmaganligi sababli jazo muddati noma’lum muddatga kechiktirildi. Taxminlarga ko‘ra, bu ish aktyorga yengilroq jazo tayinlash maqsadida qilingan. Hozircha navbatdagi qarorni kutar ekanmiz, quyida qonun bilan bog‘liq muammolarga duch kelgan boshqa turk yulduzlari haqida ma’lumot beramiz.
Sevil Akdag
“Taqiqlangan meva” serialida ishtirok etgan Sevil Akdag qotillik ishi bo‘yicha tergov qilinmoqda. 2025-yil aprel oyida aktrisa dugonasi Elif Kirava bilan janjallashib, g‘azab ustida unga taxminan 30 marotaba pichoq urgan. Voqeadan so‘ng Sevil Akdag o‘z joniga qasd qilmoqchi bo‘lgan, ammo bunga ulgurmay, hibsga olingan. So‘roq paytida u jinoyatni mast holatda sodir etganini va tafsilotlarni eslay olmasligini aytgan. Endilikda unga uzoq muddatli qamoq jazosi tahdid solmoqda.
Feyza Jivelek
“Qizil sharbat” serialidagi Nilay roli bilan tanilgan Feyza Jivelek 2024-yilda narkotik moddalar bilan shug‘ullanuvchi shaxs bilan uchrashuv vaqtida politsiya tomonidan qo‘lga olingan. Ma’lum bo‘lishicha, aktrisa buyurtmani olish uchun kelgan, ammo tovar o‘sha vaqt uning qo‘lida aniqlanmagani sababli ozod qilingan.
Adnan Koch
“Muhtasham yuz yil” serialida Bahrom posho obrazini yaratgan Adnan Koch 2018-yilda taqiqlangan moddalarni saqlash va tarqatishda gumonlanib hibsga olingan. Aktyor politsiyaga qarshilik ko‘rsatgan va bu holat ishni yanada murakkablashtirgan. Natijada u 16 yil 8 oy muddatga ozodlikdan mahrum etilgan.
Kivanch Tatlitug
“Taqiqlangan sevgi” seriali yulduzi Kivanch Tatlitug 2014-yilda jinoyat ishi bo‘yicha tergov qilingan. U ikki yil davomida daromadlarini yashirganlikda ayblangan. Dastlab unga 10 yil qamoq jazosi tahdid solgan edi. Biroq aktyorning advokati o‘z mijozining aybdor emasligini, asl aybdor esa buxgalter ekanligini isbotlagan va aktyorning nomini oqlab bergan.
Chag‘atoy Ulusoy
“Yovvoyi asal” filmidagi roli bilan tanilgan Chag‘atoy Ulusoy 2013-yilda giyohvand moddalarni sotishda gumonlanib hibsga olingan. Aktyor mahsulot tarqatish bilan bog‘liq ayblovni rad etgan, biroq o‘zi iste’mol qilganini tan olgan. Sud uni to‘rt yilga ozodlikdan mahrum qilgan, ammo hukm qayta ko‘rib chiqilgach, jazosi 10 oy muddatga qisqartirilgan.
Izoh (0)