Sirdaryoning Sayhunobod tumanida 4-iyun kuni 6 nafar mast fuqaro tez yordam xodimlarini sababsiz kaltaklagani xabar berilgan edi. Sog‘liqni saqlash vazirligi bu masala yuzasidan bosh prokurorga murojaat yo‘lladi.
Vazirlikning qayd etishicha, voqea oqibatida 28 yoshli shifokor J.O. “Bosh miya chayqalishi, o‘ng qosh sohasi yirtilgan jarohati, o‘ng qovoq sohasi gematomasi, ko‘krak sohasi yumshoq to‘qimalari lat yeyishi” tashxisi bilan, 44 yoshli feldsher V.N. esa “Bosh miya chayqalishi, yuz sohasi, chakka sohalari yumshoq to‘qimalarining lat yeyishi, o‘ng qo‘l kaft suyagi asosidan yopiq sinish” tashxisi bilan Sayxunobod tuman tibbiyot birlashmasi shoshilinch tez yordam bo‘limiga yotqizilgan.
“Tibbiyot xodimlariga nisbatan tajovuzkor harakatlar sodir etishayotgani juda achinarli va buni hech qanaqasiga oqlab bo‘lmaydigan holatdir”, — deyiladi xabarda.
Shu sababli mazkur holat yuzasidan Sog‘liqni saqlash vaziri bosh prokurorga murojaat yo‘lladi. Unda yuqorida qayd etilgan holatni nazoratga olgan holda, aybdor shaxslar qattiq javobgarlikka tortilishini ta’minlashda amaliy yordam so‘raldi.
Izoh (0)