Buxoro viloyatidagi xususiy bog‘chalarning birida uch yoshli bola tok urishidan vafot etdi. Bu haqda viloyat Prokuraturasi xabar berdi.
Ma’lum qilinishicha, Buxoro tumanida joylashgan YTT O‘lmas Xolboyevaga qarashli bo‘lgan maktabgacha ta’lim tashkilotida 28-martda 2023-yilda tug‘ilgan Shaxram Sharipov elektr toki urishi oqibatida vafot etgan. Mazkur holat yuzasidan tuman prokuraturasi tomonidan Jinoyat kodeksining 116-moddasi 3-qismi bilan jinoiy ish qo‘zg‘atilgan.
Holat yuzasidan o‘tkazilgan dastlabki tergovda mazkur nodavlat maktabgacha ta’lim tashkiloti tarbiyachisi M.D.ning vazifasiga yoshi va individual xususiyatlarini inobatga olgan holda bolalarning hayoti va salomatligini muhofaza qilish, texnika va yong‘in xavfsizligi qoidalariga rioya qilish kabi kasbiy majburiyatlar kirishi belgilangan bo‘lsa-da, o‘z kasbiga nisbatan beparvo hamda o‘z vazifalarini lozim darajada bajarmagani va o‘ziga biriktirilgan guruhda tarbiyalanuvchilarni qarovsiz qoldirgani aniqlandi.
Natijasiga ko‘ra mazkur jinoyat ishi 18-iyunda mazmunan ko‘rishlik uchun sud muhokamasiga yuborildi.
Sirdaryo viloyatining Mirzaobod tumanidagi oilaviy maktabgacha ta’lim tashkilotida ikki yoshli bola vafot etgandi. Shuningdek, fevral oyida oilaviy nodavlat maktabgacha ta’lim tashkiloti tarbiyalanuvchisi nazoratsiz qolishi oqibatida chiqib ketib, vafot etgan.
Bundan tashqari, Qashqadaryodagi bog‘chada 2 yoshli qizcha nazoratsiz qolgani sabab vafot etgani xabar qilingandi.
Izoh (0)