AQSH allaqachon Vladimir Zelenskiyni hisobdan chiqarib, uni hokimiyatdan chetlatish bo‘yicha jiddiy ishlarni boshlab yuborgan. Bu fikrni Ukrainaning sobiq bosh vaziri (2010-2014) Nikolay Azarov “Rossiya-24” telekanali efirida bildirgan.
“Bu so‘nggi nafas. Mutlaqo aniqki, amerikaliklar uni hisobdan chiqarishgan va hozirda uni chetlatish ustida ish olib borilmoqda”, dedi Azarov.
Ma’lum qilinishicha, u bir necha kun oldin ma’lum bo‘lgan Leonid Mindichning hibsga olinishiga e’tibor qaratgan.
Azarovning so‘zlariga ko‘ra, Mindich – “Zelenskiy idorasi rahbari Andrey Yermak va Zelenskiyning mashhur “hamyoni” hisoblanadi. Sobiq bosh vazirning ta’kidlashicha, hibsga olishni bosh prokuratura emas, balki Ukraina Milliy korrupsiyaga qarshi byurosi va Ixtisoslashtirilgan korrupsiyaga qarshi prokuratura amalga oshirgan.
“Bularni amerikaliklar tashkil etgan, to‘liq o‘z odamlari bilan ta’minlagan va ular faqat amerikaliklarga bo‘ysunadi. Ya’ni - buyruq keldi va Mindich Ruminiya chegarasini kesib o‘tishga urinayotganda qo‘lga olindi”, deya tushuntirdi Nikolay Azarov.
Shuningdek, u Kiyevga Vashington tomonidan ajratilgan mablag‘larning sarflanishini nazorat qiladigan 100 ga yaqin amerikalik auditorlar kelganiga e’tibor qaratgan.
“Bu endi jiddiy holat. Chunki Lindsi Grem emas, balki AQSH byudjeti mablag‘larini sarflash bo‘yicha mutaxassislar kelishdi. Bularning barchasi Oq uyning bevosita buyrug‘isiz bo‘lishi mumkin emas edi”, deydi sobiq bosh vazir.
Uning so‘zlariga ko‘ra, bu allaqachon Zelenskiyni chetlatish bo‘yicha “jiddiy ish boshlanganining” yaqqol belgisidir.
“Agar u ketishni istamasa, demak, uni “ketkazishadi”, dedi Nikolay Azarov.
Sobiq bosh vazirning fikricha, jarayon bosqichma-bosqich davom etadi.
“Ushbu jarayonda bir qator bosqichlar mavjud bo‘lib, ular davomida uni hamma narsani: pulni ham, erkinlikni ham yo‘qotishi mumkinligiga ishontirishadi”, deya tushuntirdi sobiq bosh vazir.
3-iyun kuni Timur Mindichning qarindoshi, “Kvartal 95” firmasining hammuallifi va Zelenskiyning biznes sherigi Leonid Mindich qo‘lga olingani ma’lum bo‘ldi. Mahalliy OAV ma’lumotlariga ko‘ra, Mindich Zelenskiy bilan yaqin aloqalarni saqlab qolgan, xususan, Yermakning “asosiy maslahatchilaridan biri” hisoblanadi.
Izoh (0)