Туркия президенти Ражаб Тойиб Эрдўғон Франция президенти Эммануэл Макрон билан телефон орқали суҳбатда Украина ва Россия ўртасида тинчлик ўрнатиш бўйича ҳар қандай ташаббусни амалга оширишга тайёрлигини маълум қилди. Бу ҳақда Туркия раҳбари девонхонаси хабар берди.
Таъкидланишича, суҳбат Макроннинг ташаббуси билан ўтказилган.
Музокаралар давомида икки давлат раҳбарлари Туркия ва Франция ўртасидаги икки томонлама муносабатлар, Россия ва Украина ўртасидаги тинчлик жараёни, шунингдек, Ғазо секторидаги вазият ҳам қўшилган ҳолда кўплаб минтақавий ва глобал воқеаларни муҳокама қилдилар.
“Президент Эрдўғон Макронга Туркиянинг адолатли тинчлик ўрнатиш орқали Украина-Россия можаросини бартараф этиш бўйича саъй-ҳаракатлари давом этаётганини ва Аляска ҳамда Вашингтондаги алоқаларни синчковлик билан кузатиб бораётганини айтган. Шунингдек, Туркия раҳбари Анқаранинг Москва ва Киев ўртасидаги тинчлик музокаралари доирасидаги ҳар қандай саъй-ҳаракатларни қўллаб-қувватлашга тайёр эканлигини таъкидлади”, дейилади хабарда.
18 август куни Оқ уйда АҚШ ва Украина президентлари Дональд Трамп ва Владимир Зеленскийнинг учрашуви бўлиб ўтди. Ундан сўнг Трамп Европа етакчиларини қабул қилди. Учрашув Трампнинг Аляскада Россия президенти Владимир Путин билан музокараларидан бир неча кун ўтгач содир бўлди. Оқ уй раҳбари Киев ва Европа билан Украинадаги можарони ҳал қилиш йўлларини, шунингдек, АҚШ-Россия-Украина уч томонлама саммитини ўтказиш имкониятини муҳокама қилди. Кейинчалик Трамп воситачилигида Путин ва Зеленский учрашуви ташкил этилиши кутилмоқда.
Бундан аввал Украина президенти Владимир Зеленский Россия раҳбари Владимир Путин билан музокараларни Австрия, Швейцария ёки Туркияда ўтказишга рози эканини билдирди.
Изоҳ (0)