“Manchester Yunayted” yozgi transfer oynasi yopilishidan oldin “Antverpen” darvozaboni Senne Lammens bilan shartnoma imzolashi mumkin. Bu haqda insayder Fabrisio Romano xabar berdi.
Unga ko‘ra, “qizil iblislar” belgiyalik darvozabon Senne Lammensga jiddiy qiziqish bildirmoqda. Klub rahbariyati uni Altay Bayindir va Andre Onanaga o‘rinbosar sifatida jamoaga jalb etishni rejalashtirmoqda.
Romanoning qo‘shimcha qilishicha, “Manchester Yunayted” bir necha oydan beri 23 yoshli Lammensning o‘yinlarini diqqat bilan kuzatib kelmoqda. Belgiyalik posbon “Antverpen”ning asosiy darvozaboni bo‘lib, o‘tgan mavsum barcha musobaqalarda jami 44 ta o‘yinda maydonga tushib, 10 marotaba darvozasi daxlsizligini saqlab qolgan.
Shuningdek, Fichajes nashri xabariga ko‘ra, “Manchester Yunayted” Senne Lammensdan tashqari “Aston Villa” darvozaboni Emiliano Martines hamda “Fiorentina” darvozaboni David de Xea nomzodlarini ham ko‘rib chiqmoqda. Ingliz klubi yozgi transfer oynasi yakunigacha yangi posbon bilan shartnoma imzolashni maqsad qilgan, chunki Altay Bayindir va Andre Onana ishonchni oqlay olmayapti.
- Senne Lammensning “Antverpen” bilan shartnomasi 2027-yilning yoziga qadar amal qiladi.
- Transfermarkt portali belgiyalik kiperning qiymatini 9 million yevroga baholamoqda.
Izoh (0)