G‘azoda qariyb 2 yildan beri davom etayotgan urush oqibatida halok bo‘lgan falastinliklar soni 62 mingdan oshdi. Sektorda Isroilning uzluksiz bombardimoni, ocharchilik va oziq-ovqat izlab chiqqan tinch aholining o‘ldirilishi davom etmoqda. Bu haqda Al Jazeera xabar berdi.
G‘azoda 18-avgust tongidan buyon sektor bo‘ylab amalga oshirilgan hujumlarda kamida 30 kishi, jumladan, gumanitar yordam olish niyatida bo‘lgan 14 nafar falastinlik halok bo‘lgan. “As-Sabra” mahallasiga qilingan zarbada jurnalist Islom Al-Koumi ham jon bergani tasdiqlangan.
“Isroil G‘azo shahrida og‘ir artilleriya, qiruvchi samolyot va dronlardan foydalanib, qolgan uy-joylarni ham vayron qilmoqda. Bu taktika shaharlarni xarobalarga aylantirish va keyinchalik yerusti harbiy amaliyotlarni osonlashtirishga qaratilgan”, deydi Al Jazeera muxbiri Tareq Abu Azzoum.
Yahudiy davlati qolgan oz sonli tibbiyot markazlarini ham nishonga olmoqda. Ko‘plab odamlar xarobaga aylangan uylar yoki vaqtinchalik chodirlarda yashashga majbur bo‘lmoqda, ba’zilar esa janubga ko‘chib o‘tishga qurbi yetmayapti. BMTning Jahon oziq-ovqat dasturi ma’lumotiga ko‘ra, G‘azodagi 5 yoshgacha bo‘lgan barcha 320 ming bola keskin ocharchilik xavfi ostida. G‘azo sog‘liqni saqlash vazirligi esa blokada tufayli kamida 263 kishi, jumladan, 112 bola ochlikdan halok bo‘lganini ma’lum qilgan.
BMTning falastinlik qochqinlarga yordam agentligi (UNRWA) bolalar 3 yil davomida maktabdan bebahra qolganini, ularning “yo‘qolgan avlod”ga aylanish xavfi borligini ta’kidlamoqda. Amnesty International esa Isroilni “Falastin jamiyatining sog‘ligi va ijtimoiy hayotini sistematik ravishda yo‘q qilishda” ayblab, G‘azoda ocharchilik ataylab qo‘llanilayotganini bildirgan.
Shu bilan birga, “Chegarasiz shifokorlar” tashkiloti ham yordam tarqatish markazlari yaqinida minglab odamlarning o‘limi yoki yaralanishlariga guvoh bo‘layotganini bildirgan. G‘azo sog‘liqni saqlash vazirligiga ko‘ra, may oyidan buyon yordam olish uchun to‘plangan joylarda deyarli 2 ming odam halok bo‘lgan.
Shu kunlarda Qatar va Misr vositachiligida 60 kunlik sulh taklifi ilgari surilmoqda. HAMAS manbalari esa 19-avgust uni ma’qullaganini bildirdi. Kelishuvga ko‘ra, Isroilda saqlanayotgan ayrim falastinliklar hamda G‘azoda tutqunlikda bo‘lgan isroilliklarning yarmi ozod qilinishi mumkin.
Izoh (0)