Malayziyaning Terengganu shtatida uzrsiz juma namozini qoldirgan erkaklar jazolanadi. Bu haqda South China Morning Post xabar berdi.
Shu tariqa erkaklar ikki yilgacha qamoqqa olinishi yoki 3000 ringgitgacha (710 dollar) jarimaga tortilishi mumkin. Ikkala jazo chorasi ham qo‘llanilishi inkor etilmagan. Qaror Terengganu shtatini boshqaruvchi Pan-Malayziya islom partiyasi tomonidan qabul qilingan.
Bu eslatma juda muhim, chunki juma namozi nafaqat diniy ramz, balki musulmonlarning itoatkorlik ifodasidir. Shu sababli bu majburiyatni bajarmaganlar eslatmalarni e’tiborsiz qoldirsa, jazo faqat so‘nggi chora sifatida qo‘llaniladi, dedi shtat ijroiya kengashi a’zosi Muhammad Xalil Abdul Hodi.
Juma namozini ado etishni eslatish maqsadida masjid hududlarida bannerlar o‘rnatiladi. Kampaniya Terengganuda amal qilayotgan qonun haqida jamoatchilik xabardorligini oshirishga qaratilgan.
Ma’lumot uchun, bu shtatda juma namozini ado etmaganlar qamalishi bo‘yicha birinchi holat emas. Xususan, 2019-yilda olti nafar erkakka bir oylik qamoq jazosi tayinlangandi. Yoshi 17 dan 35 gacha bo‘lgan erkaklar juma namozi o‘rniga sharshara yonida piknik qilayotganda qo‘lga olingan. Malayziyada musulmon erkaklar uchun juma namozida qatnashish majburiy hisoblanadi. Biroq odatda uni qoldirganlar uchun og‘ir jazolar berilmasdi.
Izoh (0)