Jazirama va qurg‘oqchilik Yevropada keng ko‘lamli o‘rmon yong‘inlarini keltirib chiqarmoqda. Oqibatda 2025-yilda mintaqada deyarli Lyuksemburg maydoniga teng hudud yonib kul bo‘lgan. Bu haqda Euronews xabar berdi.
15-iyul holatiga ko‘ra, yongan hududlarning umumiy maydoni 231 539 gektarni tashkil etadi. Bu o‘rtacha ko‘rsatkichdan 119 foizga ko‘p degani.
So‘nggi haftalarda Turkiyadagi o‘rmon yong‘inlari o‘n minglab odamlarni yashab turgan uylaridan ko‘chishga majbur etgan va kamida 3 kishining hayotiga zomin bo‘lgan. Krit orolida ommaviy evakuatsiya e’lon qilinib, Marselda yong‘inlar tartibsizliklarga sabab bo‘lgan. Bu hodisalar ro‘yxati o‘sishda davom etmoqda.
Iqlim o‘zgarishi yong‘inlar ko‘payishiga sabab bo‘lmoqdami?
Wildfire axborot agentligiga ko‘ra, haftalik yong‘inlarning umumiy soni ham o‘rtacha ko‘rsatkichdan ancha yuqorilagan. 15-iyul holatiga ko‘ra, Yevropa mintaqasida haftada o‘rtacha 1 230 ta yong‘in sodir bo‘lgan. Odatda yilning bu davrida o‘rtacha 478 ta hodisa qayd etilar edi. Yong‘inlarning ko‘payishi asosan fevral va mart oylaridagi quruq va issiq havo sabab yuzaga kelgan.
Qo‘shimcha qilinishicha, atmosferaga uglerod chiqindilari chiqishining ko‘payishi havoni isishiga va yog‘ingarchilikning kamayishiga olib keladi. Bu holat o‘rmonlarni quritib, ularni yong‘inlarga yanada moyil qilib qo‘yadi.
Iqlimshunos olim Mark Parringtonning ta’kidlashicha, 16-iyulga qadar Yevropa Ittifoqining barcha mamlakatlaridan o‘rmon yong‘inlari sabab atmosferaga chiqarilgan uglerod chiqindilari 1,9 megatonnani tashkil etadi.
Qaysi davlatlar yong‘indan zarar ko‘rgan?
Bu yilgi yong‘inlardan aziyat chekkan davlatlar qatoriga Turkiya, Buyuk Britaniya, Gretsiya, Portugaliya, Ispaniya va Ruminiya kiradi.
Izoh (0)