2025-yilning o‘tgan yetti oyida elektromobillar importi o‘tgan yil mos davridagiga qaraganda ikki baravar ko‘paydi. Bu haqda Bojxona qo‘mitasi maʼlumot berdi.
Joriy yil yanvar-iyul oylarida O‘zbekistonga umumiy qiymati 293,2 million dollarlik 20 873 dona elektromobil import qilindi. Bu tarixiy ko‘rsatkich bo‘lib, oldingi yillar mos davrlarida bunday raqam qayd etilmagan. Taqqoslash uchun, 2024-yilning dastlabki yetti oyida respublikaga xorijdan 155,8 million dollarga 10 536 ta elektromobil olib kirilgan.
Umuman olganda, 2024-yilda jami qiymati 224,7 million dollarlik 24 091 dona elektromobil importi amalga oshirilgan.
Eʼtiborli jihati benzinda harakatlanuvchi yengil avtomobillar importi keskin qisqarish trendiga o‘tgan. Jumladan, joriy yilning yetti oyida 195,9 million dollarlik 9 498 ta avtomobil olib kirilgan. O‘tgan yil mos davrida esa qariyb 509 million dollar evaziga 23 219 ta mashina import qilingandi. Gibrid avtomobillar importi ham ikki davr oralig‘ida 7 265 donadan 1 852 donaga qisqargan.
Avvalroq joriy yil iyulida yengil elektromobillar savdosi keskin o‘sgani xabar qilingandi. Oy davomida O‘zbekistonda 6,5 ming dona elektromobil sotilgan. Bu oylik savdolar hajmi bo‘yicha rekord hisoblanadi.
Izoh (0)