Жорий йил июлда автомобиль савдоси ҳажми сезиларли ошиб, 2024 йил январдан бери энг юқори даражага етди. Бу ҳақда Иқтисодий тадқиқотлар ва ислоҳотлар маркази таҳлилида маълум қилинди.
2025 йил июль ойида Ўзбекистон автомобиль бозорида савдолар сезиларли даражада кўпайган. Ой давомида жами 116,8 минг дона машина сотилган. Бу июндагига нисбатан 27 фоизга кўп, 2024 йил январидан бери (144,5 минг дона) энг юқори кўрсаткичдир.
“Бундай динамика мавсумий пасайиш давридан кейин бозор фаоллигининг тикланишини кўрсатади”, дейилади шарҳда.
Ўтган ойда мамлакатда енгил автомобиллар умумий сотуви сони 100 минг донани ташкил этди. Мазкур рақам июндагидан 25 фоизга кўп. Таққослаш учун, июнь ойида енгил автомобиллар савдоси майдагидан 3 фоизга ўсганди. Бунда июлдаги ўсиш суръатлари сезиларли тезлашганини кўриш мумкин.
Савдолар ўсишининг энг юқори даражаси Тошкент (ўсиш 51 фоиз), Наманган (49 фоиз) ва Хоразм (40 фоиз) вилоятларида қайд этилган.
Янги ишлаб чиқарилган енгил автомобиллар сотуви ҳам июнь ойига нисбатан 38,2 фоизга кўпайиб, 38,4 минг донани ташкил этган.
Маҳаллий ишлаб чиқарилган янги енгил машиналар энг кўп сотилган. Савдолар июндагидан 38,6 фоиз ўсиш билан 32,9 минг донага етган.
Хорижда ишлаб чиқарилган янги енгил автомобиллар савдоси ҳам ижобий динамика кўрсатган. Июлда 5,4 минг дона мазкур турдаги машина сотилган. Бу кўрсаткич июнь ойидагидан 35,8 фоизга юқори.
Таҳлил қилинишича, июлда енгил автомобиллар бозорининг иккиламчи сегментида ҳам фаоллик сезиларли ошди. Савдо ҳажми 61,5 минг донани ташкил этган бўлиб, июнь ойидагига қараганда 18 фоизга кўпдир. Таққослаш учун, июнь ойида савдо ҳажми май ойига нисбатан 0,4 фоизга кам бўлган. Шу боис, июль ойидаги кескин ўсиш ушбу сегментда умумий фаоллашувни акс эттиради.
Июнь ойида енгил электромобиллар савдосининг ўсиш суръати май ойига нисбатан 1,7 фоизга пасайган бўлса, июль ойида бозор тез суръатларда ўсишни кўрсатган. Бунда савдо ҳажми рекорд даражадаги 6,5 минг донани ташкил этган. Мазкур рақам июндагига нисбатан 28,2 фоизга кўп.
