Opta statistik portali superkompyuter orqali 2025/26-yilgi mavsum Ispaniya La Ligasida qaysi jamoa g‘olib bo‘lishi mumkinligi bo‘yicha o‘z taxminlarini e’lon qildi.
Unga ko‘ra, “Barselona” chempionlik uchun asosiy da’vogar bo‘lib turibdi. Kataloniyaliklarning turnirda g‘olib bo‘lish imkoniyati 46,5 foizga baholangan. “Ko‘k-anorranglilar” yangi mavsumni amaldagi chempion sifatida boshlaydi. Kataloniyaliklar o‘tgan yil La Liga, Ispaniya Kubogi hamda Ispaniya Superkubogida g‘alaba qozonib, trebl qayd etgan. Hansi Flik uchun debyut mavsum ajoyib o‘tdi. Mutaxassislar germaniyalik murabbiy yangi mavsumda ham “Barselona” bilan La Ligada g‘alaba qozonishini taxmin qilmoqda.
Madridning “Real” klubi 32,1 foiz bilan ikkinchi o‘rinni egallagan. Madridliklar Klublar o‘rtasidagi Jahon chempionatida yarim finalgacha yetib bordi, ammo ular “Pari Sen-Jermen”ga yirik hisobda mag‘lub bo‘lib, turnir bilan xayrlashdi. Biroq “Bayer”ning sobiq bosh murabbiyi bu natijani yangi davrning boshlanishi emas, balki oldingi bobning yakuni sifatida baholadi. Biroq mutaxassislar Xabi Alonso La Ligadagi debyut mavsumidayoq chempionlikni qo‘lga kirita olmasligini taxmin qilmoqda.
Madridning boshqa jamoasi — “Atletiko” esa 11,7 foiz imkoniyat bilan uchinchi o‘rinda qayd etilgan. “Matraschilar” o‘tgan mavsum Ispaniya chempionatida bronza medallarini qo‘lga kiritdi. Diego Simeone qo‘l ostidagi jamoa yozda tarkibini yanada kuchaytirdi. Shunga qaramay, “Atletiko”ning chempionlik imkoniyatlari past baholangan.
2025/26-yil Ispaniya La Ligasida g‘alaba qozonish imkoniyati yuqori bo‘lgan 10 jamoa:
- “Barselona” — 46,5%
- “Real” Madrid — 32,1%
- “Atletiko” Madrid — 11,7%
- “Vilyarreal” — 3,7%
- “Atletik” Bilbao — 2,9%
- “Betis” — 0,9%
- “Osasuna” — 0,5%
- “Selta” — 0,4%
- “Real Sosyedad” — 0,4%
- “Valensiya” — 0,2%
Eslatib o‘tamiz, o‘tgan mavsum “Barselona” 88 ochko bilan Ispaniya chempioni bo‘lgan edi. “Real” esa 84 ochko bilan ikkinchi o‘rinni egallagan.
Izoh (0)