Londondagi Xitrou aeroporti yaqinida Samsung mobil qurilmalarini tashiyotgan yuk mashinasi o‘g‘irlab ketildi. Bu haqda Yonhap xabar berdi.
Umumiy zarar 10,6 million dollarga baholanmoqda. Jami 12 mingta qurilma yo‘qolgan, shundan 5 mingtadan ortig‘i — eng so‘nggi Galaxy Z Flip 7 va Fold 7 “buklanadigan” telefonlari bo‘lgan. Tovarlar orasida Galaxy S25, Galaxy A16 va 5000 ta Galaxy Watch 8 aqlli soat modellari ham bor. Bu hodisa Buyuk Britaniyada qayd etilgan eng yirik elektron qurilmalar o‘g‘irliklaridan biri sifatida qayd etilgan.
Ta’kidlanishicha, o‘g‘irlik puxta rejalashtirilgan, chunki yuk mashinasi tovar partiyasi aeroportga yetib kelishi bilanoq o‘g‘irlab ketilgan. Britaniya politsiyasi tergov boshlagan va allaqachon o‘g‘rilangan konteynerni topdi. Biroq tovarlar topilgani yoki yo‘qligi haqida ma’lumot berilmagan.
Samsung ushbu telefonlarni sug‘urtalagani uchun kompaniya katta zarar ko‘rmaydi. Ammo xaridorlar ehtiyot bo‘lishi lozim, chunki o‘g‘irlangan qurilmalar ko‘pincha ikkilamchi bozorlarda sotiladi. Ular qora ro‘yxatga kiritilishi yoki rasmiy xizmat ko‘rsatish huquqiga ega bo‘lmasligi mumkin. Britaniya politsiyasining baholashicha, o‘g‘irlangan mobil qurilmalarning 75 foizigacha chet elga olib chiqib ketiladi, bu esa ularni qidirib topishni ancha qiyinlashtiradi.
Izoh (0)