Buyuk Britaniyada kuchga kirgan yangi “Onlayn xavfsizlik to‘g‘risidagi” qonun tufayli ijtimoiy tarmoqlar, jumladan, X va Reddit Ukraina va G‘azodagi urushga oid ko‘plab kontentlarni cheklay boshladi. Bu haqda BBC xabar berdi.
Ma’lum qilinishicha, 25-iyul kuni kuchga kirgan qonun 18 yoshgacha bo‘lgan foydalanuvchilarni zararli kontentlar: pornografiya, o‘z-o‘ziga zarar yetkazish, ocharchilik, urush va zo‘ravonlikni targ‘ib qiluvchi har qanday postlarni cheklashni ko‘zda tutadi. Unga rioya qilmagan platformalar katta jarimalarga tortiladi. Xususan, ular 18 million funt sterlinggacha yoki global daromadining 10 foizi miqdorida jarima to‘laydi.
Bildirilishicha, ushbu qonun tufayli jamoat manfaatiga oid kontentlar ham cheklanmoqda. Masalan, G‘azoda o‘z oilasining jasadlarini izlayotgan erkak tasvirlangan video yoki Ukrainadagi Shahed dronining urib tushirilgan lavhasi va hattoki, parlamentda aytilgan ba’zi nutqlar ham bloklangan.
Mutaxassislar bu holat so‘z erkinligiga xavf tug‘dirishini ta’kidlamoqda. Texnologiyalar bo‘yicha ekspertlar, ayniqsa, kompaniyalarning kontentni haddan ortiq bloklashi jiddiy muammolarga olib kelishi mumkinligini aytmoqda. Britaniya hukumati esa platformalar qonunni buzmasdan, siyosiy bahslarni senzura qilmasligini ta’kidlagan.
Ma’lumotlarga ko‘ra, X va Reddit foydalanuvchilarining katta qismi ijtiomoiy tarmoqdan akkauntsiz foydalanadi, bu esa ularni avtomatik ravishda voyaga yetmagan sifatida ko‘rsatadi va ko‘plab kontentlarga kirishni cheklaydi.
X tarmog‘ining egasi Ilon Mask onlayn xavfsizlik to‘g‘risidagi qonunni qattiq tanqid qilmoqda. Jumladan, u X da shunday post qoldirdi:
“Bu qonunning maqsadi - xalqni tinchlantirish va bostirish.”
Izoh (0)