“Toshshahartransxizmat”ning 7,5 yilga qamalgan sobiq rahbari Anvar Jo‘rayev ozodlikka chiqqani haqida xabar berilgandi. Oliy sud holat yuzasidan bayonot berdi.
Unda aytilishicha, jinoyat ishlari bo‘yicha Yunusobod tuman sudining 2025-yil 3-fevraldagi hukmiga ko‘ra Anvar Jo‘rayev va “Toshshahartransxizmat” AJ hamda AJ tasarrufidagi avtobus saroylarining 20 nafar xodimi Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) 3-qismi “a” bandi va boshqa moddalarida nazarda tutilgan jinoyatlarni sodir etganlikda aybli deb topilgan.
Dastlabki tergov jarayonida 21 nafar sudlanuvchidan 10 nafariga “qamoq” ehtiyot chorasi qo‘llanilgan. Sud tomonidan 6 ta sudlanuvchiga nisbatan (A. Jo‘rayevga 7 yil 6 oy muddatga) ozodlikdan mahrum qilish jazosi tayinlangan.
Xususan, 6 nafar sudlanuvchi qamoqdan ozod qilinib, ochiqda bo‘lgan 2 nafar sudlanuvchiga ozodlikdan mahrum qilish jazosi tayinlanib, sud zalidan qamoqqa olingan.
Sud hukmi bilan sudlanuvchi Anvar Jo‘rayev va boshqalardan 2 mlrd 475 mln 687 ming 526 so‘m undirilishi belgilangan hamda sudlanuvchilarga tegishli 2 ta uy-joy yetkazilgan moddiy zararni qoplashga qaratilgan va zarardan ortgan pul mablag‘lari davlat foydasiga o‘tkazilishi belgilangan.
Anvar Jo‘rayev va 10 nafar sudlanuvchi tomonidan berilgan apellyatsiya shikoyatlari va prokuror keltirgan protest asosida ushbu jinoyat Toshkent shahar sudining apellyatsiya instansiyasida ko‘rilgan bo‘lib, sud jarayoni davomida sudlanuvchilar tomonidan yetkazilgan zarar to‘liq qoplangan.
Ta’kidlanishicha, Jinoyat kodeksining 167-moddasi 4-qismida yetkazilgan moddiy zararning o‘rni qoplangan taqdirda ozodlikni cheklash va ozodlikdan mahrum qilish tariqasidagi jazo qo‘llanilmasligi belgilangan.
Shu bois, apellyatsiya sudining 2025-yil 5-iyundagi ajrimi bilan asosiy jinoyat bo‘yicha yetkazilgan zarar qoplangani sababli sudlanuvchilarga ozodlikdan mahrum qilish bilan bog‘liq bo‘lmagan jazo tayinlanib, depozit hisob raqamiga to‘langan pullar davlat foydasiga o‘tkazilishi belgilangan.
Bundan tashqari, jinoiy yo‘l bilan topilgan mablag‘larga olingan va zararni qoplashga qaratilgan 2 ta uy-joy davlat foydasiga musodara qilindi.
Endilikda ushbu ajrimdan norozi taraflar Jinoyat–protsessual kodeksining 510-moddasi (taftish tartibida qayta ko‘rilishi mumkin bo‘lgan sud hukmlari, ajrimlari) talablariga muvofiq Toshkent shahar sudiga taftish tartibida shikoyat berishga yoki protest bildirishga haqliligi ma’lum qilindi.
Anvar Jo‘rayev 2017-yil may oyidan buyon “Toshshahartransxizmat” boshqaruv raisi lavozimida ishlab kelgandi. 2024-yilning fevralida u bir necha shaxs bilan o‘zaro til biriktirib, avtobus saroylaridagi ehtiyot qismlar, yoqilg‘i mahsulotlarini talon-toroj qilish yo‘li bilan davlat manfaatlariga juda ko‘p miqdorda iqtisodiy zarar yetkazishda gumonlanib qamoqqa olingandi.
2025-yil 3-fevral kuni jinoyat ishlari bo‘yicha Olmazor tumani sudida Anvar Jo‘rayev va yana 20 kishiga nisbatan sud hukmi o‘qilgandi. Ushbu hukm bilan Anvar Jo‘rayev 3 yil “Toshshahartransxizmat” tizimida mansabdorlik va moddiy javobgarlik bor lavozimlarda ishlash huquqidan mahrum qilinib, 7 yil 6 oy muddatga ozodlikdan mahrum qilingandi. U sudda bergan ko‘rsatmasida qo‘yilgan ayblovlarga umuman iqror bo‘lmagan, talon-toroj qilingan ehtiyot qismlari holatlaridan tergovda xabar topganini aytgan. Shundan so‘ng appelyatsiya shikoyati berilgandi.
Izoh (0)