“Toshshahartransxizmat”ning 7,5 yilga qamalgan sobiq rahbari ozodlikka chiqdi

“Toshshahartransxizmat”ning 7,5 yilga qamalgan sobiq rahbari Anvar Jo‘rayevga berilgan jazo o‘zgartirildi.

Toshkent shahar sudi jinoyat ishlari bo‘yicha apellyatsiya instansiyasi sudlov hay’atining “Daryo” tanishgan 2025-yil 5-iyundagi ajrimi bilan Anvar Jo‘rayevga tayinlangan jazo o‘zgartirildi. Unga uzil-kesil o‘tash uchun 3 yil muddatga “Toshshahartransxizmat” AJ tizimida mansabdorlik va moddiy javobgarlik yuklatilgan lavozimlarda ishlash huquqidan mahrum qilib, 4,5 yil muddatga ozodlikni cheklash jazosi tayinlandi.

Anvar Jo‘rayevga yashash joyini hukmning ijrosini nazorat qiluvchi organ ruxsatisiz o‘zgartirmaslik, O‘zbekistondan tashqariga chiqmaslik, ommaviy va boshqa tadbirlarda ishtirok etmaslik taqiqlari yuklatilgan. Unga nisbatan qo‘llangan qamoqqa olish tarzidagi ehtiyot chorasi bekor qilinib, sud zalidan ozod qilingan.

Anvar Jo‘rayev 2017-yil may oyidan buyon “Toshshahartransxizmat” boshqaruv raisi lavozimida ishlab kelgandi. 2024-yilning fevralida u bir necha shaxs bilan o‘zaro til biriktirib, avtobus saroylaridagi ehtiyot qismlar, yoqilg‘i mahsulotlarini talon-toroj qilish yo‘li bilan davlat manfaatlariga juda ko‘p miqdorda iqtisodiy zarar yetkazishda gumonlanib qamoqqa olingandi.

2025-yil 3-fevral kuni jinoyat ishlari bo‘yicha Olmazor tumani sudida Anvar Jo‘rayev va yana 20 kishiga nisbatan sud hukmi o‘qilgandi. Ushbu hukm bilan Anvar Jo‘rayev 3 yil “Toshshahartransxizmat” tizimida mansabdorlik va moddiy javobgarlik bor lavozimlarda ishlash huquqidan mahrum qilinib, 7 yil 6 oy muddatga ozodlikdan mahrum qilingandi. U sudda bergan ko‘rsatmasida qo‘yilgan ayblovlarga umuman iqror bo‘lmagan, talon-toroj qilingan ehtiyot qismlari holatlaridan tergovda xabar topganini aytgan. Shundan so‘ng appelyatsiya shikoyati berilgandi.