Kamchatkada 30-iyul kuni yuz bergan zilziladan so‘ng O‘zbekistonning Vladivostok shahridagi bosh konsuli Yusup Kabuljanov Rossiyaning Uzoq sharqiy federal okrugida bo‘lib turgan o‘zbekistonliklarga murojaat bilan chiqdi.
“Bosh konsulxona Kamchatka o‘lkasi va Saxalin viloyati hududida vaqtincha bo‘lib turgan O‘zbekiston fuqarolarini favqulodda vaziyatlar xizmatlari ko‘rsatmalariga rioya qilishga va xotirjamlikni saqlashga chaqiradi”, deyiladi murojaatda.
Kamchatka Sog‘liqni saqlash boshqarmasi bergan ma’lumotga ko‘ra, zilzila vaqtida jabrlangan fuqarolar shifokorlar nazoratida, barcha bemorlarga zarur yordam ko‘rsatilmoqda, jiddiy jarohatlanganlar qayd etilmagan. Jabrlanganlar orasida O‘zbekiston fuqarolari yo‘q.
Rossiya Favqulodda vaziyatlar vazirligi sunami xavfi sabab Kamchatka o‘lkasi va Saxalin viloyati qirg‘oqlaridagi aholiga yuqoriroq hududlarga chiqishni va suvga yaqinlashmaslikni tavsiya qilmoqda.
Yusup Kabuljanov zarurat tug‘ilsa, fuqarolar O‘zbekistonning Vladivostokdagi Bosh konsulxonasiga quyidagi raqamlar orqali murojaat qilishlari mumkinligini bildirdi:
- +7 (423) 260-48-00
- +7 (902) 078-70-07.
Rossiyaning Kamchatka o‘lkasi qirg‘oqlariga yaqin joyda joylashgan Tinch okeanida kuchli zilzila 30-iyun kuni yuz berdi. Dastlabki ma’lumotlarga ko‘ra, yer silkinishi magnitudasi 8,7 ballni tashkil etib, 1952-yildan keyin Kamchatka o‘lkasida sodir bo‘lgan yer silkinishlari orasida eng kattasi hisoblanadi. Ushbu zilzila yer yuzida qayd etilgan kuchli zilzilalar qatoriga kirib, oltinchi o‘rinni egalladi.
Kamchatka o‘lkasi gubernatori Vladimir Solodov fuqarolarga qirg‘oq hududlaridan yiroq bo‘lishni, ommaviy axborot vositalari va ovoz kuchaytirgichlar orqali e’lon qilinayotgan ogohlantirishlarga amal qilishni tavsiya qilmoqda.
Izoh (0)