Мудофаа вазирлиги тизимида тайинловлар амалга оширилди. Бу ҳақда вазирлик ахборот хизмати хабар берди.
Келтирилишича, президентнинг тегишли фармойишига мувофиқ, генерал майор Фарҳод Шерматов Ортиқович Ўзбекистон ҳарбий хавфсизлик ва мудофаа университети бошлиғининг биринчи ўринбосари лавозимига тайинланди. Генерал майор Шерматов Фарҳод Ортиқович ушбу тайинловга қадар Жануби-ғарбий махсус ҳарбий округ қўшинлари қўмондони лавозимида фаолият юритган.
Шунингдек, полковник Кадиржон Турсунов Абдипаттаевич Жануби-ғарбий махсус ҳарбий округ қўшинлари қўмондони лавозимига тайинланди. Полковник Турсунов Кадиржон Абдипаттаевич ушбу тайинловга қадар Ўзбекистон мудофаа вазирининг жанговар тайёргарлик бўйича ўринбосари лавозимида фаолият юритган.
Полковник Қаҳрамонжон Зоидов Обиджонович Ўзбекистон ҳарбий хавфсизлик ва мудофаа университетининг Қуруқликдаги қўшинлар институти бошлиғи лавозимига тайинланди.
Полковник Абдулла Хамраев Ўзбекистон ҳарбий хавфсизлик ва мудофаа университетининг Ҳарбий авиация институти бошлиғи лавозимига тайинланди.
Подполковник Бахтиёр Раҳимов Нематович Ўзбекистон ҳарбий хавфсизлик ва мудофаа университетининг Ахборот-коммуникация технологиялари ва алоқа ҳарбий институти бошлиғи лавозимига тайинланди.
Тиббий хизмат полковниги Улуғбек Расулов Абдугафурович Ўзбекистон ҳарбий хавфсизлик ва мудофаа университетининг Ҳарбий тиббиёт институти бошлиғи лавозимига тайинланди.
29 июль куни президент Шавкат Мирзиёев ҳарбий таълим тизимини такомиллаштиришга оид таклифлар тақдимоти билан танишган эди. Таклифга кўра, Қуролли кучлар академияси ислоҳ қилиниб, унинг негизида Ҳарбий хавфсизлик ва мудофаа университети ташкил этилиши кўзда тутилмоқда.
Мудофаа вазирлигининг барча ҳарбий таълим муассасалари – 5 та институт, Сержантлар тайёрлаш олий мактаби ҳамда Авиация ва учувчисиз учиш аппаратлари мутахассисларини тайёрлаш маркази институт мақомида мазкур университет таркибига ўтказилади.
Изоҳ (0)