AQSHda lift texnik nosozlik tufayli jarrohning boshini buzib tashladi. Bu haqda The Mirror nashrida xabar berdi.
Voqea Texas shtatining Hyuston shahrida yuz bergan. 35 yoshli Xitoshi Nikaydo ismli shifokor klinikaning ikkinchi qavatidagi liftga kirmoqchi bo‘lgan, ammo boshini ichkariga kiritganida, eshiklar to‘satdan yopilib, uning boshini uzib tashlagan.
O‘sha paytda lift kabinasida erkakning ayol hamkasbi bo‘lgan. Lift tiqilib qolgani bois, u yana 20 daqiqa davomida kesilgan bosh bilan qolib ketgan. Ayolga zarur yordam ko‘rsatilgan, biroq jarrohni qutqarishning iloji bo‘lmagan.
Tergov davomida aniqlanishicha, voqeadan bir necha kun oldin texniklar ko‘targichni ta’mirlagan bo‘lgan.
“Hodisaga ortiqcha sim sabab bo‘lgan. Bitta o‘rniga ikkita sim o‘tkazilgan va shu tariqa bo‘shliq to‘ldirilgan. Agar u bo‘sh qolganida, datchiklar to‘g‘ri ishlagan va tiqilib qolgan odamni hech qanday muammosiz qo‘yib yuborgan bo‘lardi”, deyiladi xabarda.
Ta’kidlanishicha, Xitoshi Nikaydo asli yaponiyalik bo‘lib, bolaligida AQSHga ko‘chib kelgan va 2003-yilda Texas universitetining tibbiyot fakultetini tugatib, otasi singari jarroh bo‘lgan.
Statistik ma’lumotlarga ko‘ra, AQSHda liftlar har yili 30 ga yaqin o‘lim va 17100 jarohatlanishga sabab bo‘lmoqda. Miloddan avvalgi 236-yilda Arximed tomonidan yaratilgan birinchi liftdan beri texnologiyalar rivojlanganiga qaramay, liftlar bilan bog‘liq muammolar hali-hanuz uchrab turibdi.
Izoh (0)