Niderlandiya Isroil milliy xavfsizlik vaziri Itamar Ben-Gvir va moliya vaziri Betsalel Smotrichni persona non grata deb e’lon qildi. Bu haqda NOS nashri xabar bermoqda.
Shuningdek, mamlakat ikkala vazirni SIS Shengen ma’lumotlar bazasiga “kirishi maqsadga muvofiq bo‘lmagan chet elliklar” sifatida kiritishga intilmoqda.
Niderlandiya tashqi ishlar vaziri Kaspar Veldkampning ta’kidlashicha, bu qaror vazirlarning bir necha bor “Falastin aholisiga qarshi zo‘ravonlikka undagani, noqonuniy turar-joylarni kengaytirishni qat’iy yoqlagani va G‘azoda etnik tozalash o‘tkazishga chaqirgani” bilan bog‘liq.
Veldkamp yana bir bor Isroilni G‘azoga nisbatan siyosatini o‘zgartirishga va xalqaro gumanitar huquq bo‘yicha majburiyatlariga rioya qilishga chaqirgan.
Shuningdek, TIV rahbari Niderlandiya G‘azo sektorini ta’minlashga hissa qo‘shmoqchi ekanligini va BMTning Loyihalarga xizmat ko‘rsatish boshqarmasi (UNOPS) jamg‘armasiga 1,5 million yevro ajratayotganini, yana 3 million yevro Qizil Xochga yo‘naltirilishini ta’kidlagan.
Niderlandiya hukumati agar Yevropa komissiyasi 29-iyulda Isroil gumanitar kelishuvlarga rioya qilmayapti degan xulosaga kelsa, Isroil bilan kelishuvning savdo qismini to‘xtatish tashabbusini ilgari surishni rejalashtirmoqda.
28-iyulda Niderlandiya birinchi marta Isroilni qirollik milliy xavfsizligiga tahdid soladigan davlatlar ro‘yxatiga kiritgani ma’lum qilingan. Rasmiy ma’lumotlarga ko‘ra, yahudiy davlati “chet eldagi, jumladan, Niderlandiyadagi siyosat va jamoatchilik fikriga ta’sir o‘tkazishga” urinmoqda.
Izoh (0)