Нидерландия Исроил миллий хавфсизлик вазири Итамар Бен-Гвир ва молия вазири Бэтсалел Смотрични персона нон грата деб эълон қилди. Бу ҳақда NОS нашри хабар бермоқда.
Шунингдек, мамлакат иккала вазирни SIS Shengen маълумотлар базасига “кириши мақсадга мувофиқ бўлмаган чет элликлар” сифатида киритишга интилмоқда.
Нидерландия ташқи ишлар вазири Каспар Велдкампнинг таъкидлашича, бу қарор вазирларнинг бир неча бор “Фаластин аҳолисига қарши зўравонликка ундагани, ноқонуний турар-жойларни кенгайтиришни қатъий ёқлагани ва Ғазода этник тозалаш ўтказишга чақиргани” билан боғлиқ.
Велдкамп яна бир бор Исроилни Ғазога нисбатан сиёсатини ўзгартиришга ва халқаро гуманитар ҳуқуқ бўйича мажбуриятларига риоя қилишга чақирган.
Шунингдек, ТИВ раҳбари Нидерландия Ғазо секторини таъминлашга ҳисса қўшмоқчи эканлигини ва БМТнинг Лойиҳаларга хизмат кўрсатиш бошқармаси (UNOPS) жамғармасига 1,5 миллион евро ажратаётганини, яна 3 миллион евро Қизил Хочга йўналтирилишини таъкидлаган.
Нидерландия ҳукумати агар Европа комиссияси 29 июлда Исроил гуманитар келишувларга риоя қилмаяпти деган хулосага келса, Исроил билан келишувнинг савдо қисмини тўхтатиш ташаббусини илгари суришни режалаштирмоқда.
28 июлда Нидерландия биринчи марта Исроилни қироллик миллий хавфсизлигига таҳдид соладиган давлатлар рўйхатига киритгани маълум қилинган. Расмий маълумотларга кўра, яҳудий давлати “чет элдаги, жумладан, Нидерландиядаги сиёсат ва жамоатчилик фикрига таъсир ўтказишга” уринмоқда.
Изоҳ (0)