Hindiston hukumati aprel oyida Kashmir mintaqasida yuz bergan terakt ortida turgan 3 nafar hujumchi o‘ldirilganini ma’lum qildi. Bu haqda 29-iyul kuni Hindiston ichki ishlar vaziri Amit Shah parlamentda ma’lum qildi.
Amit Shahning aytishicha, “Mahadev” nomli maxsus operatsiyada Hindiston armiyasi, Markaziy zaxira politsiyasi hamda Jammu va Kashmir politsiyasi tomonidan ushbu hujumda ayblanayotgan 3 nafar jangari yo‘q qilingan.
“Pahalgam vodiysida fuqarolarimizni qatl qilgan aynan mana shu 3 terrorchi edi. Ularning barchasi yo‘q qilindi”, dedi u.
Vazirga ko‘ra, yo‘q qilingan shaxslarning barchasi Pokiston fuqarolari bo‘lgan.
Ma’lumot uchun, aprel oyida Kashmirning Pahalgam vodiysida qurollangan shaxslar tinch aholiga o‘t ochib, 26 kishini, asosan, hindistonlik sayyohlarni o‘ldirgandi. Bu voqea butun Hindistonda g‘azab uyg‘otib, Dehli va Pokiston o‘rtasida qurolli to‘qnashuvlarni keltirib chiqargandi.
Hindiston hujum ortida Pokistonni ayblagan, biroq Islomobod bu ayblovni rad etgan. Voqeadan so‘ng, Nyu Dehli qo‘shni mamlakat hududiga bir necha bor aviazarbalar uyushtirgan. Bunga javoban Pokiston ham o‘z harbiy operatsiyasini boshlab, ikki tomonning to‘qnashuvida ko‘plab odamlar halok bo‘lgandi.
Shahning aytishicha, may oyida Hindiston razvedkasi ushbu jangarilarning Srinagar shahri yaqinidagi Dachigam milliy bog‘ida yashiringanini aniqlagan va bir necha oy davomida bu ma’lumotning aniqligi tekshirilgan.
Qayd etilishicha, Kashmir mintaqasi 1947-yilda Buyuk Britaniya mustamlakasidan ajralib chiqqan ikki davlat — Hindiston va Pokiston o‘rtasida bahsli hudud sanaladi. Ular shu paytgacha bu hududda 3 marotaba urush olib borgan.
Aprel voqeasidan keyingi 4 kunlik to‘qnashuv so‘nggi yillarlardagi eng keskin qurolli qarama-qarshilik bo‘ldi. AQSH prezidenti Donald Tramp urushdan so‘ng o‘t ochishni to‘xtatish kelishuvi Vashington vositachiligida tuzilganini aytgan. Biroq Hindiston bu da’voni rad etgan.
Izoh (0)