“Barselona” bosh murabbiyi Hansi-Diter Flik yangi mavsumga tayyorgarlik jarayonining boshlanishi bilan birga futbolchilarning maydondan tashqaridagi xatti-harakatlariga nisbatan qattiqroq talablar joriy etdi. Bu haqda Ispaniyaning Sport.es nashri xabar berdi.
Manbaning yozishicha, murabbiy jamoa atrofidagi ortiqcha shov-shuvlar va OAV e’tiborini kamaytirish maqsadida futbolchilarga kechki tadbirlar va shaxsiy ziyofatlar sonini keskin kamaytirishni buyurgan. Endilikda o‘yinchilarning ishtirokida o‘tkaziladigan tijorat va marketing faoliyatlari ehtiyotkorlik bilan, omma e’tiboridan chetda tashkil etiladi. Bunday tadbirlar birinchi jamoaning kunlik mashg‘ulot rejimiga xalaqit bermasligi qat’iy belgilangan.
Shuningdek, Flik futbolchilardan ijtimoiy tarmoqlardagi faollikni kamaytirishni, media maydondagi ko‘rinishni cheklashni va diqqatni faqat futbolga qaratishni talab qilgan.
Mazkur qaror klubdagi intizom va professional yondashuvni kuchaytirish maqsadida qabul qilingan. Xabar qilinishicha, bu chora-tadbirlar Lamin Yamal o‘zining 18 yoshini nishonlash uchun uyushtirgan bazmdan so‘ng kuchaytirilgan.
Izoh (0)