“Барселона” бош мураббийи Ҳанси-Дитер Флик янги мавсумга тайёргарлик жараёнининг бошланиши билан бирга футболчиларнинг майдондан ташқаридаги хатти-ҳаракатларига нисбатан қаттиқроқ талаблар жорий этди. Бу ҳақда Испаниянинг Sport.es нашри хабар берди.
Манбанинг ёзишича, мураббий жамоа атрофидаги ортиқча шов-шувлар ва ОАВ эътиборини камайтириш мақсадида футболчиларга кечки тадбирлар ва шахсий зиёфатлар сонини кескин камайтиришни буюрган. Эндиликда ўйинчиларнинг иштирокида ўтказиладиган тижорат ва маркетинг фаолиятлари эҳтиёткорлик билан, омма эътиборидан четда ташкил этилади. Бундай тадбирлар биринчи жамоанинг кунлик машғулот режимига халақит бермаслиги қатъий белгиланган.
Шунингдек, Флик футболчилардан ижтимоий тармоқлардаги фаолликни камайтиришни, медиа майдондаги кўринишни чеклашни ва диққатни фақат футболга қаратишни талаб қилган.
Мазкур қарор клубдаги интизом ва профессионал ёндашувни кучайтириш мақсадида қабул қилинган. Хабар қилинишича, бу чора-тадбирлар Ламин Ямал ўзининг 18 ёшини нишонлаш учун уюштирган базмдан сўнг кучайтирилган.
Изоҳ (0)