Selim Bayraktar — juda iste’dodli turk teatr va kino aktyoridir. Turk seriallari muxlislari uni “Muhtasham yuz yil” serialidagi Sumbul og‘a rolidan tanishadi.
Selim Bayraktar 1975-yil 17-iyunda Iroqning Kirkuk shahrida dunyoga kelgan. Yoshligidanoq u sportga, ayniqsa gimnastikaga qiziqqan. Selim13 yoshga to‘lganida, oilasi yashirincha Turkiyaga qochishga majbur bo‘lgan. Bunga sabab Bayraktar o‘qigan maktabga Saddam Husaynning qiyofadoshi kelib, o‘g‘il bolalarni o‘z armiyasiga yollashga harakat qiladi. Selim ham tanlanganlar orasida bo‘lgan, otasi buni bilgach, o‘sha kechasiyoq butun oilasini Eskishaharga olib ketgan.
Selim yuqori sinfga o‘tgach, oilasi Anqaraga ko‘chib o‘tgan va u Xajattepa universitetiga o‘qishga kirgan.
“Men Misr kinolarini ko‘rib ulg‘ayganman. Aktyorlik meni doimo o‘ziga tortardi. Bir kuni litseydan qaytayotib, afishaga ko‘zim tushdi. Teatr kurslari guruhga qabul e’lon qilgan ekan. Maktabdosh do‘stim bilan birga bordik. Kurslarga atigi 10 kishi qabul qilinardi, xohlovchilar esa 650 kishi edi. Biz tanlovdan o‘tdik! Juda ajoyib pyesalar o‘ynadik. Biz Turkiyada birinchi bo‘lib sahna o‘rniga yuk mashinasi va parda o‘rniga chodirlardan foydalanib, ko‘chma teatr yaratdik”.
Shundan so‘ng Selim bir yil sirkda ishlagan, keyin esa Diyorbakir davlat teatriga ishga joylashgan. Uning aytishicha, o‘qish paytida uni opasi moddiy jihatdan qo‘llab-quvvatlagan, ota-onasi yordam bera olmagan, otasi esa uzoq vaqt davomida o‘g‘lining aktyor bo‘lishiga butunlay qarshi bo‘lgan.
Kino
Selim Bayraktar kinoga 2006-yilda “Ko‘prik” serialida Erdal rolini ijro etish bilan qadam qo‘ydi. 2009-yilda u “Agar bulut bo‘lsam” serialida rol oldi va ikki yil o‘tib turk seriallari olamining haqiqiy yulduziga aylandi. Aynan o‘sha paytda Selim mashhur “Muhtasham yuz yil” serialida Sumbul og‘a rolini qo‘lga kiritdi.
“Menimcha, qahramonim har qanday aktyor uchun ramziy obraz. Bu rolni ijro etish menga nasib etganidan juda baxtiyorman. Sumbul — haramning yuragi. Hamma har qanday masalada unga murojaat qiladi. U haramda bo‘layotgan barcha voqealardan xabardor, hamma yangiliklarni birinchilardan bo‘lib eshitadi. Tarixiy manbalardan haramdagi og‘alarning hayoti naqadar og‘ir bo‘lganini bilamiz. Ba’zida ular yillab ko‘chaga chiqmagan. Ma’lumki, ularning ko‘pchiligi sil kasalligiga chalinib, vafot etgan. Ular ko‘p sirlarni saqlagan, ammo hech kimning tarafini olmagan odamlar edi. Haqiqiy haram og‘asi, masalan, na Mohidavron sultonning, na Hurram sultonning tarafdori bo‘la olardi”, deya eslaydi u.
Uning filmografiyasi 40 ga yaqin filmni o‘z ichiga oladi va unda tarixiy rollar alohida ahamiyatga ega. Selim Bayraktar “Afsona”da Alpagu xon, “Vazir barmog‘i”da Ekmelettin, “Usmonli imperiyasining yuksalishi”da Chandarli Xalil poshsho rollarini ijro etib, muxlislarini maftun etdi va xuddi shu qahramonni “Mehmed: Fotihllar sultoni” serialida ham o‘ynadi.
Selim Bayraktar “Vidolashuv maktubi”, “Zumrad qaqnus”, “Yovvoyi narsalar”, “Sevgi yig‘latadi”, “Merosxo‘rlar”, “Zolim Istanbul”, “Ko‘zga ko‘ringan odam”, “Katta-kichik yolg‘on” va boshqa film hamda seriallarda rol ijro etgan.
Shaxsiy hayoti
Selim Bayraktor shaxsiy hayoti haqida hech qachon batafsil ma’lumot bermagan. U 2004-yilda Davlat konservatoriyasi xodimasi Bixterga uylangan. U xotini bilan varrak uchirayotganda tanishgan va bir-birini darhol sevib qolishgan ekan. Atrofdagilar ularning nikohini ideal deb bilishgani bois mashhur juftlikning ajrashishi Bayraktarning hamkasblari va do‘stlari uchun kutilmagan voqea bo‘ldi. 2019-yilda Selim va Bixter ajralishdi. Ularning nikohidan farzand ko‘rishmagan. Juftlik ajralish sabablarini oshkor qilishmadi.
2018-yilda “Aziz qo‘shnim” filmi suratga olinayotganda Selim Emel Karakyose bilan tanishdi. O‘sha paytda aktrisa ajrashgan va qizini yolg‘iz o‘zi tarbiyalayotgan edi. Bixterdan ajrashganidan so‘ng bir necha kun o‘tib, Bayraktar ijtimoiy tarmoqlarda Emelga bag‘ishlangan postlar joylay boshladi. 2023-yil may oyida ular rasman nikohdan o‘tdi, marosimda faqat eng yaqin do‘stlari va hamkasblari qatnashdi.
Selim Bayraktar hozir
Hozirgi kunda Bayraktar kinoda suratga tushishni davom ettirmoqda va ba’zan teatrda ham rol o‘ynamoqda. Turk aktyor bo‘sh vaqtini rafiqasi va do‘stlari davrasida o‘tkazadi. U o‘z salomatligi va tashqi ko‘rinishiga alohida e’tibor qaratadi. Selim haftasiga kamida to‘rt marta sport zaliga boradi va faol dam olishni, ayniqsa vindsyorfing yoki skeytbord uchishni juda yoqtiradi. Turdizi yulduzi anchadan beri tez hazm bo‘ladigan uglevodlar miqdori kam bo‘lgan parhezga amal qiladi — u chekmaydi va deyarli spirtli ichimliklar iste’mol qilmaydi.
Selim Bayraktar juda bilimli inson. U kitob o‘qishni yaxshi ko‘radi, jahon tarixini o‘rganadi va arab, kurd hamda turk tillarida bemalol gaplashadi. Turdizi yulduzi Gollivudda suratga tushish orzusida bo‘lgani uchun ingliz tilini ham o‘rganishni rejalashtirmoqda. Turk aktyor o‘zini chinakam baxtli deb hisoblaydi, chunki u o‘z orzusini ro‘yobga chiqarib, mashhur va e’tiborli san’atkorga aylandi, shu bilan birga, haqiqiy muhabbatni ham topdi.
Izoh (0)