АҚШ Адлия вазирлиги ходимлари молиячи Жеффри Эпштейн иши бўйича ҳужжатларни ўрганиб чиқиб, уларда Дональд Трампнинг номи бир неча бор қайд этилганини аниқлаган. Бу ҳақда The Wall Street Journal газетаси президент маъмуриятидаги юқори лавозимли манбаларга таяниб хабар бермоқда.
Бу ҳақда Трампга май ойида бош прокурор Пем Бонди ва унинг ўринбосари Оқ уйда бўлиб ўтган учрашувда маълумот берган. WSJ суҳбатдошларининг айтишича, учрашувда Трампга ҳужжатларда Эпштейн билан алоқада бўлган кўплаб шахслар, жумладан, таниқли инсонлар ҳақида “текширилмаган миш-мишлар” мавжудлиги тушунтирилган. Шу билан бирга, йиғилишда амалдорлар ҳужжатларда исмнинг тилга олиниши ўз-ўзидан ҳуқуқбузарликни англатмаслигини таъкидлашган.
Бундан ташқари, манбаларга кўра, Трампга Адлия вазирлиги Эпштейн бўйича қўшимча тергов материалларини эълон қилиш ниятида эмаслиги, чунки ҳужжатларда болалар порнографияси ва жабрланувчиларнинг шахсий маълумотлари мавжудлиги ҳақида хабар берилган. Трамп вазирлик қарорига ишонч билдирганини ва материаллар эълон қилинмаслигига эътироз билдирмаслигини айтган.
Нашрнинг АҚШ президенти маъмуриятига яқин суҳбатдошларига кўра, Федерал қидирув бюроси директори Кеш Пател бошқа амалдорларга Трампнинг исми Эпштейн ҳужжатларида кўрсатилганини махфий тарзда маълум қилган. Пател WSJ саволларига жавоб беришдан бош тортган, бироқ Адлия вазирлиги сайтидаги қўшимча ҳужжатлар нима учун эълон қилинмаслигини тушунтирувчи меморандум “пухта текширув натижаларига мос келишини” таъкидлаган.
15 июль куни ABC News журналисти Трампдан Пем Бонди унга Эпштейн файлларида унинг исми борлигини айтганми, деб сўраган. Трамп “Йўқ, йўқ, у биз учун жуда қисқа маълумот берган холос”, дея жавоб берган.
Оқ уйнинг коммуникациялар бўйича директори Стивен Чонг эса “бу навбатдаги сохта хабар, худди The Wall Street Journal’да чоп этилган аввалги ҳикоя сингари” деб таъкидлаган.
Изоҳ (0)