Turkiyaning eng mashhur tarixiy seriallaridan biri “Hukmdor Usmon” (Kuruluş: Osman)da bosh rolni ijro etgan Burak O‘zchivit loyihani tark etdi. Bu haqda taniqli jurnalist Birsen Altuntash xabar berdi.
Serialning 7-mavsumi 2025-yil kuzida namoyish etilishi va unda Usmon G‘oziyning hukmronlik davrining yakunlanishi aks etishi kerak edi. Ammo bosh rolni ijro etgan aktyor va prodyuserlar o‘rtasidagi moliyaviy kelishmovchiliklar bunga to‘sqinlik qildi.
Ma’lum bo‘lishicha, Burak O‘zchivit har bir seriya uchun 4 million turk lirasi (taxminan 99 ming AQSH dollari) miqdorida gonorar so‘ragan. Prodyuserlar bunday narxni haddan tashqari yuqori deb baholab, aktyor bilan shartnomani uzaytirmaslikka qaror qilgan. Bu ziddiyat ijtimoiy tarmoqlarda ham aks etgan: aktyor va suratga olish jamoasi bir-birini obunadan chiqarib tashlagani muxlislar e’tiboridan chetda qolmagan.
Shu sababli endilikda yakuniy mavsumda voqealar ketma-ketligi o‘zgaradi. Dastlab tomoshabinlar qarib qolgan Usmon beyni ko‘rishadi, so‘ng voqealar O‘rxon G‘oziy — Usmon o‘g‘lining hukmronlik davriga o‘tadi. O‘zge Torer, ya’ni Bala xotun obrazi ijrochisi esa serialda qoladi. Bu aktrisa 2019-yildan buyon loyiha tarkibida bo‘lib, Burak O‘zchivit bilan birga serialning asosiy juftligi sifatida tanilgan.
Avvalgi mavsumlarda yosh O‘rxon rolini ijro etgan Emre Bey ham loyihani tark etgan. Hozirda uning obraziga bir nechta mashhur aktyorlar nomzodi ko‘rib chiqilmoqda. Ular orasida Mert Yazichio‘g‘lu, Murat Yunalmish, Ibrohim Chelikkol kabilar bor. Shuningdek, keksayib qolgan G‘oziyning rolini kim ijro etishi hali noma’lum, ammo bu obrazda tajribali aktyor ishtirok etishi shubhasiz.
Serial muxlislari Burak O‘zchivitning ketishidan ajablangan bo‘lsa-da, aktyorning sodiq muxlislari uni qo‘llab-quvvatlamoqda. Ularning fikricha, O‘zchivit 2019-yildan beri bir xil obrazda qolib ketgan va yangi rollar va janrlarda allaqachon ish boshlashi kerak.
Ma’lumot uchun, “Hukmdor Usmon” seriali 2019-yildan boshlab efirga uzatilgan bo‘lib, unda 13-asr oxirlarida Usmoniylar imperiyasining vujudga kelish jarayoni tasvirlanadi. Burak O‘zchivit ushbu roli uchun bir necha marta mukofotlar va xalqaro e’tirofga sazovor bo‘lgan.
Izoh (0)