Туркиянинг энг машҳур тарихий сериалларидан бири “Ҳукмдор Усмон” (Kuruluş: Osman)да бош ролни ижро этган Бурак Ўзчивит лойиҳани тарк этди. Бу ҳақда таниқли журналист Бирсен Алтунташ хабар берди.
Сериалнинг 7-мавсуми 2025 йил кузида намойиш этилиши ва унда Усмон Ғозийнинг ҳукмронлик даврининг якунланиши акс этиши керак эди. Аммо бош ролни ижро этган актёр ва продюсерлар ўртасидаги молиявий келишмовчиликлар бунга тўсқинлик қилди.
Маълум бўлишича, Бурак Ўзчивит ҳар бир серия учун 4 миллион турк лираси (тахминан 99 минг АҚШ доллари) миқдорида гонорар сўраган. Продюсерлар бундай нархни ҳаддан ташқари юқори деб баҳолаб, актёр билан шартномани узайтирмасликка қарор қилган. Бу зиддият ижтимоий тармоқларда ҳам акс этган: актёр ва суратга олиш жамоаси бир-бирини обунадан чиқариб ташлагани мухлислар эътиборидан четда қолмаган.
Шу сабабли эндиликда якуний мавсумда воқеалар кетма-кетлиги ўзгаради. Дастлаб томошабинлар қариб қолган Усмон бейни кўришади, сўнг воқеалар Ўрхон Ғозий — Усмон ўғлининг ҳукмронлик даврига ўтади. Ўзге Торер, яъни Бала хотун образи ижрочиси эса сериалда қолади. Бу актриса 2019 йилдан буён лойиҳа таркибида бўлиб, Бурак Ўзчивит билан бирга сериалнинг асосий жуфтлиги сифатида танилган.
Аввалги мавсумларда ёш Ўрхон ролини ижро этган Эмре Бей ҳам лойиҳани тарк этган. Ҳозирда унинг образига бир нечта машҳур актёрлар номзоди кўриб чиқилмоқда. Улар орасида Мерт Язичиўғлу, Мурат Юналмиш, Иброҳим Челиккол кабилар бор. Шунингдек, кексайиб қолган Ғозийнинг ролини ким ижро этиши ҳали номаълум, аммо бу образда тажрибали актёр иштирок этиши шубҳасиз.
Сериал мухлислари Бурак Ўзчивитнинг кетишидан ажабланган бўлса-да, актёрнинг содиқ мухлислари уни қўллаб-қувватламоқда. Уларнинг фикрича, Ўзчивит 2019 йилдан бери бир хил образда қолиб кетган ва янги роллар ва жанрларда аллақачон иш бошлаши керак.
Маълумот учун, “Ҳукмдор Усмон” сериали 2019 йилдан бошлаб эфирга узатилган бўлиб, унда 13-аср охирларида Усмонийлар империясининг вужудга келиш жараёни тасвирланади. Бурак Ўзчивит ушбу роли учун бир неча марта мукофотлар ва халқаро эътирофга сазовор бўлган.
Изоҳ (0)