Toshkent shahar hokimligi piyodalar xavfsizligi uchun 7,5 milliard so‘m ajratdi.
Poytaxt hokimining qaroriga ko‘ra, shahardagi ko‘cha va yo‘llarda harakat xavfsizligini ta’minlash, ayniqsa piyodalar bilan bog‘liq yo‘l-transport hodisalarining oldini olish maqsadida temir panjaralar o‘rnatish ishlari uchun qariyb 7 milliard so‘m (6 mlrd 912 mln 500 ming so‘m) mablag‘ ajratilishi belgilandi.
Mazkur ishlar Toshkent shahar hokimligi “Yagona buyurtmachi xizmati” injiniring kompaniyasi buyurtmachiligida, Toshkent shahri hokimligi huzuridagi Toshkent shahrini rivojlantirish jamg‘armasi mablag‘lari hisobidan moliyalashtiriladi.
Bundan tashqari, yo‘l harakati xavfsizligini ta’minlash bilan bog‘liq qo‘shimcha ishlarni amalga oshirish maqsadida tuman obodonlashtirish boshqarmalariga 588 million so‘m mablag‘ ajratilishi ham qarorda belgilangan.
Umumiy hisobda ushbu tadbirlar uchun 7,5 milliard so‘mga yaqin mablag‘ yo‘naltiriladi. Loyihalar orqali piyodalar xavfsizligini oshirish, yo‘l-transport hodisalarini kamaytirish va shaharning infratuzilmasini yaxshilash maqsad qilingan.
May oyida ham Toshkent shahri hokimi poytaxtda yo‘l-transport hodisalarining oldini olish uchun 2 milliard 44 million so‘m ajratish to‘g‘risida qaror imzolagan edi.
20-may kuni imzolangan qarorga ko‘ra, ushbu mablag‘lar yo‘l harakati xavfsizligini ta’minlash ishlari bilan bog‘liq xarajatlarni amalga oshirish uchun tasdiqlangan manzilli ro‘yxatga asosan Toshkent shahrini rivojlantirish jamg‘armasi mablag‘lari hisobidan tuman Obodonlashtirish boshqarmalariga ajratiladi.
Mablag‘ning 1 milliard 460 million so‘mi piyodalar bo‘yicha yo‘l-transport hodisalarining oldini olish maqsadida ko‘cha va yo‘llar bo‘ylab temir panjara o‘rnatish uchun sarflanadi.
Izoh (0)