Тошкент шаҳар ҳокимлиги пиёдалар хавфсизлиги учун 7,5 миллиард сўм ажратди.
Пойтахт ҳокимининг қарорига кўра, шаҳардаги кўча ва йўлларда ҳаракат хавфсизлигини таъминлаш, айниқса пиёдалар билан боғлиқ йўл-транспорт ҳодисаларининг олдини олиш мақсадида темир панжаралар ўрнатиш ишлари учун қарийб 7 миллиард сўм (6 млрд 912 млн 500 минг сўм) маблағ ажратилиши белгиланди.
Мазкур ишлар Тошкент шаҳар ҳокимлиги “Ягона буюртмачи хизмати” инжиниринг компанияси буюртмачилигида, Тошкент шаҳри ҳокимлиги ҳузуридаги Тошкент шаҳрини ривожлантириш жамғармаси маблағлари ҳисобидан молиялаштирилади.
Бундан ташқари, йўл ҳаракати хавфсизлигини таъминлаш билан боғлиқ қўшимча ишларни амалга ошириш мақсадида туман ободонлаштириш бошқармаларига 588 миллион сўм маблағ ажратилиши ҳам қарорда белгиланган.
Умумий ҳисобда ушбу тадбирлар учун 7,5 миллиард сўмга яқин маблағ йўналтирилади. Лойиҳалар орқали пиёдалар хавфсизлигини ошириш, йўл-транспорт ҳодисаларини камайтириш ва шаҳарнинг инфратузилмасини яхшилаш мақсад қилинган.
Май ойида ҳам Тошкент шаҳри ҳокими пойтахтда йўл-транспорт ҳодисаларининг олдини олиш учун 2 миллиард 44 миллион сўм ажратиш тўғрисида қарор имзолаган эди.
20 май куни имзоланган қарорга кўра, ушбу маблағлар йўл ҳаракати хавфсизлигини таъминлаш ишлари билан боғлиқ харажатларни амалга ошириш учун тасдиқланган манзилли рўйхатга асосан Тошкент шаҳрини ривожлантириш жамғармаси маблағлари ҳисобидан туман Ободонлаштириш бошқармаларига ажратилади.
Маблағнинг 1 миллиард 460 миллион сўми пиёдалар бўйича йўл-транспорт ҳодисаларининг олдини олиш мақсадида кўча ва йўллар бўйлаб темир панжара ўрнатиш учун сарфланади.
Изоҳ (0)