Xitoyning Tyanshuy shahridagi bolalar bog‘chalaridan birida 200 dan ortiq tarbiyalanuvchi qo‘rg‘oshindan zaharlandi. Muassasa xodimlari qo‘rg‘oshindan oziq-ovqat bo‘yog‘i sifatida foydalangan. Bu haqda CNN xabar berdi.
Bog‘cha tarbiyalanuvchilarining qoni tahlil qilinganda qo‘rg‘oshin darajasi me’yordan 2 ming baravar oshib ketgani aniqlangan. Holat aholining g‘azabini qo‘zg‘atgan.
“Zaharli va zararli oziq-ovqat bilan ta’minlaganlikda gumonlanib 8 kishi, jumladan, xususiy bog‘cha direktori qo‘lga olingan”, deyiladi Tyanshuy shahar hukumati bayonotida.
Ta’kidlanishicha, muassasa direktori va uning moliyaviy homiysi oshxona xodimlariga ovqatga rang berish uchun bo‘yoq pigmentlaridan foydalanishga ruxsat bergan. Bu esa bolalarning zaharlanishiga olib kelgan.
251 nafar tarbiyalanuvchining 233 nafarida qonda qo‘rg‘oshin miqdori me’yordan ortiq ekani aniqlangan. Ularning 201 nafari hozirda shifoxonada davolanmoqda. Bunday zaharlanishning tibbiy oqibat va zararlari haqida ommaga ma’lumot berilmagan. Ammo qo‘rg‘oshindan zaharlanish uchun kamida 3 oy davomida uni iste’mol qilish kerakligi ma’lum qilingan.
Tekshiruv davomida bolalar bog‘chasidan ikkita oziq-ovqat namunasi — bug‘da pishirilgan qizil xurmo va korndog olingan. Tahlillarga ko‘ra, ulardagi qo‘rg‘oshin miqdori 2 ming baravar ko‘p bo‘lgan.
Bo‘yoq idishlarining qadoqlarida ham “iste’molga yaroqsiz” yozuvi bo‘lgan. Bog‘cha direktori va uning sarmoyadori “rang-barang taomlar bilan ko‘proq bolalarni jalb qilib, daromadni oshirish”ni maqsad qilgan. Qo‘rg‘oshindan zaharlanish bolalarning miya rivojlanishi, xulq-atvori va IQ darajasiga salbiy ta’sir etadi.
Izoh (0)