Oliy Majlis Qonunchilik palatasi deputatlari 8-iyul kuni “Avtomobil yo‘llari to‘g‘risida”gi qonun loyihasini birinchi o‘qishda qabul qildi.
Ushbu loyiha 7 bob, 47 moddadan iborat bo‘lib avtomobil yo‘llarini, shu jumladan pulli avtomobil yo‘llarini va ularning hududlarini rejalashtirish, loyihalash, qurish, rekonstruksiya qilish, ekspluatatsiya qilish va ulardan foydalanish sohasidagi munosabatlarni tartibga solishga qaratilgan.
Qonun loyihasini qabul qilish zarurati
Hozirgi kunda amaldagi qonun ayrim masalalarni to‘liq tartibga solmayapti. Jumladan:
- pullik avtomobil yo‘llarini yaratish;
- xususiy va xorijiy investitsiyalarni jalb qilish;
- yo‘l infratuzilmasini zamonaviy axborot tizimlari bilan birlashtirish kabi masalalar qonuniy asosda to‘liq tartibga solinmagan.
Qonunchilik palatasi Spikeri o‘rinbosari Rahimjon Hakimovning qayd etishicha, bu holat yo‘llarning sifatini yaxshilash, ularni saqlash uchun mablag‘ topishda muammolar keltirib chiqarmoqda.
Ushbu qonun loyihasi sohada davlat boshqaruvini yanada takomillashtirish, yo‘l sifatini yaxshilash orqali mavjud avtomobil yo‘llari tarmog‘ini uzoq vaqtgacha soz holda saqlab turish, pulli yo‘llar tarmog‘ini barpo etish hamda sohaga investitsiyalarni, shu jumladan to‘g‘ridan-to‘g‘ri xorijiy investitsiyalarni keng jalb qilishga qaratilgan.
Qonun loyihasi bilan “avtomobil yo‘llarini rejalashtirish” mexanizmi joriy etilib, yo‘l infratuzilmasini aholi va iqtisodiyotning o‘sib borayotgan ehtiyojlariga mos ravishda rivojlantirish nazarda tutilmoqda. Yo‘llarni loyihalashtirishda aholi fikri va atrof-muhitga ta’sirini inobatga olish hamda piyodalar uchun to‘siqsiz muhitni yaratish bo‘yicha qat’iy talablar o‘rnatilmoqda.
Shuningdek, qonun loyihasiga kommunikatsiya tarmoqlarini qurishda yo‘llarning avvalgi holatini tiklash xarajatlarini qoplash sharti kiritilmoqda. Yo‘llarda katta hajmli va og‘ir vaznli transport vositalarining harakatlanishi tartibga solinmoqda. Ajratilgan va yo‘l bo‘yi mintaqalarida xizmat ko‘rsatish obyektlarini joylashtirishga oid talablar belgilanmoqda.
Pulli yo‘llar tarmog‘ini barpo etishning huquqiy asoslari yaratilmoqda. Ushbu yo‘nalishda investorlarga imtiyozlar taqdim etilmoqda.
Pulli yo‘llar tashkil etish, yo‘l infratuzilmasiga xususiy va xorijiy sarmoyalarni jalb qilish, davlat-xususiy sheriklikni kengaytirish orqali davlat byudjetiga tushayotgan yukni kamaytirish kabi masalalar taklif etilmoqda. Pulli avtomobil yo‘lining qurilishi muqobil bepul avtomobil yo‘li mavjud bo‘lganda amalga oshirilishi belgilanmoqda.
O‘zbekistonda “Avtomobil yo‘llari to‘g‘risida”gi amaldagi qonun 2007-yilda qabul qilingan. Shavkat Mirziyoyev 2025-yil may oyida yo‘l xo‘jaligidagi ishlar natijadorligi va rejadagi loyihalar bo‘yicha taqdimot bilan tanishganida bu qonun hozirgi zamon talablariga javob bermasligi, so‘nggi yillardagi islohotlar, bugungi dolzarb masalalar unda keltirilmaganini qayd etgandi. Yo‘llarni loyihalashtirishda aholi fikri va atrof-muhitga ta’sirini inobatga olish hamda piyodalar uchun to‘siqsiz muhitni yaratish bo‘yicha qat’iy talablar belgilanishi ma’lum qilingandi.
Izoh (0)