Siyosiy partiyalar 27-oktyabr kuni bo‘lib o‘tadigan saylovlarga faol tayyorgarlik ko‘rmoqda. Partiya yetakchilari o‘z chiqishlari orqali sohalarni rivojlantirish muammolariga to‘xtalib o‘tmoqda.
O‘zbekiston Liberal-demokratik partiyasi raisi Aktam Xaitovga ko‘ra transport va yo‘l qurilish sohalari islohotlarga muhtoj. Xususan, O‘zLiDeP yetakchisi:
“Transport vazirligi, Avtomobil yo‘llari davlat qo‘mitasi sohada ko‘p o‘zgarishlar qilishi zarur. Sohada raqobat yo‘qligi bois, xizmat ko‘rsatish sifati past. Narxlar yuqori va yo‘lovchilar uchun sharoitlar yetarli emas”, deya qayd etdi.
O‘z navbatida, bu kamchiliklarni mamlakatning turizm salohiyatiga salbiy taʼsiri nuqtayi nazaridan baholab o‘tdi.
Buni xorijiy turistlar va o‘zimizni fuqarolar ham bir necha bor tanqid qilib chiqdi. Yangi yo‘llar tezda taʼmirtalab bo‘lib qolmoqda, tirbandliklar muammosi haligacha o‘z yechimini topmagan.
Muammolar haqida so‘z yuritganda, liberallarning elektorati bo‘lmish fermerlar muammolariga ham to‘xtalib o‘tdi.
Jumladan, partiya raisi “qishloq xo‘jaligi sohasida erkin bozor munosabatlariga o‘tilgan bo‘lsa-da, ichki ishlar organlari va mahalliy hokimliklar ular faoliyatiga aralashishni to‘xtatmayotgani dilni biroz xira qiladi”, deya fikr bildirdi.
Misol sifatida g‘alla o‘rimi mavsumida Qashqadaryo viloyatining Ko‘kdala tumanida bo‘lib o‘tgan voqeani eslagan holda, Ichki ishlar vazirligi bunday vaziyatlarni chuqur o‘rganib, ularga huquqiy baho berishiga ishonch bildirdi.
Yuqorida ko‘tarilgan muammolar liberallarning saylovoldi dasturidan joy olishini sezish mumkin. Qolaversa, fermerlar huquqlarini himoya qilishga qaratilgan qonunlar ham saylovoldi platformasining muhim masalalaridan biriga aylanishini kutish mumkin.
Izoh (1)
Iltimos shu partiyalar o'zlarini saylash vaqti kelishidan avvalroq ham korinish berishlariga imkon bering. Shuncha gaplari bor ekan ichida. Yig'ilib ketgan ekan barchasida. Endi gapirishayapti. Buncha qiyin o'y fikrlar bilan bir saylovdan ikkinchi saylovgacha yurish oson emas