O‘zbekistonda 2026-yilgacha Toshkent—Andijon hamda Toshkent—Samarqand pulli avtomobil yo‘llarini qurib bitkazish maʼlum qilingan edi. Mazkur loyihalar Jahon banki va Yevropa tiklanish va taraqqiyot banki ko‘magida amalga oshirilishi aytilgan. Ammo har ikki yo‘l qurilishi hali boshlangani yo‘q. Transport vaziri o‘rinbosari Jasurbek Choriyev “Daryo”ga bergan intervyusida qurilishlar nega kechikkaniga izoh berdi.
Jasurbek Choriyevning aytishicha, Toshkent—Samarqand va Toshkent—Andijon pulli yo‘llari loyihalariga tuzatish kiritilgan. Hisob-kitoblar jarayoni uzoq cho‘zilgani sabab qurilish kechikmoqda.
“Birinchi Texnik-iqtisodiy asoslashni (TEO) ishlab chiqqanimizda baʼzi summalarni belgilagan edik. Keyin uni bir necha marta optimallashtirishga to‘g‘ri keldi. Chunki yangi yo‘llarda ko‘priklari, tunnel va boshqa qismlari bor. Birinchi qilingan TEOga nisbatan yangi ishlab chiqilganida katta o‘zgarishlar bo‘ldi. Yaʼni ikkala yo‘lning texnik-iqtisodiy asoslarini ishlab chiqishga ko‘p vaqt sarflandi. Jumladan, Toshkent—Andijon yo‘lida tog‘li hudud hisoblangan Qamchiq dovoni bor. U yerdan qanchalik kam tunnel qursak, loyiha shuncha arzonlashadi. Narxga o‘zimizdagi yoki chet eldan olib kelinadigan texnologiyalar, uskunalar qiymati ham taʼsir qiladi. Yo‘llarni qancha qismi tepalik yoki pastlikdan o‘tishi, qaysi uchastkaga birinchi, qay biriga ikkinchi bo‘lib yotqizilishi kerak, degan savollarga javob berishga jiddiy qaraldi va loyiha mukammallashtirildi. Shuning uchun ham bizda ozgina cho‘zilish bo‘ldi. Hozir mana tender eʼlon qilingan. Ilk natijalar Toshkent—Samarqand yo‘li bo‘yicha eʼlon qilinadi. Mazkur loyiha uchun joriy yil 26-iyun kuni birinchi takliflarni olamiz, ularni o‘rganib chiqib, dastlabki bosqichdan o‘tilgach, g‘oliblarni eʼlon qilishni boshlaymiz”, dedi vazir o‘rinbosari.
Jasurbek Choriyev pulli yo‘llar loyihalari qiymati kamaytirilganiga ham urg‘u berdi.
“Masalan, Toshkent—Samarqand pulli avtomobil yo‘li loyihasi qiymati 2,6 mlrd dollardan 2,2 mlrd dollarga pasaytirildi”, deya maʼlum qildi vazirlki rasmiysi.
Jasurbek Choriyev fikricha, yangi yo‘llar qurilishi qachon boshlanishi nomaʼlum. Buning uchun baʼzi masalalar hal etilishi kerak.
“Qurilish qachon boshlanishi hozir tenderda qatnashayotganlarga bog‘liq jarayon. Ular qanday talablar qo‘yishi ham muhim. Salohiyatli kompaniya tenderda qatnashib, bizga yana ozgina muddat beringlar, ulgurmaymiz, deydigan vaziyatlar ham bo‘ladi. Bu shunaqa texnik protses”, deya taʼkidladi vazir o‘rinbosari.
Avvalroq transport vaziri Ilhom Mahkamov Toshkent—Andijon va Toshkent—Samarqand avtomobil yo‘llari qurilishi 2025-yilda boshlanishini aytgandi. Hisob-kitoblarga qaraganda, Toshkent—Andijon pulli yo‘li loyihasining umumiy qiymati 4,65 milliard dollarni tashkil etadi.
Izoh (0)