4 kunlik ish haftasi bo‘yicha 6 oylik tajribada qatnashgan barcha 17 ta Britaniya kompaniyasi shu tartibda ishlashni davom ettirishga qaror qildi. Bu haqda The Guardian xabar bermoqda.
Ma’lum qilinishicha, jami 1000 ga yaqin xodim ishlaydigan kompaniyalar rahbariyati xodimlarning ish samaradorligi pasaymaganini, ayrim kompaniyalarda esa hatto sotuvlar oshganini e’tirof etgan. Ish kunlari qisqartirilgan bo‘lsa-da, xodimlarning ish haqi avvalgi darajada saqlanib qolgan.
Tajriba 2024-yil noyabrdan 2025-yil aprelgacha xalqaro 4 Day Week tashkiloti loyihasi doirasida Oksford, Kembrij va Boston universitetlari olimlarining ko‘magida o‘tkazilgan.
2022-yilda Buyuk Britaniyada xuddi shu loyiha doirasida ish tartibini o‘zgartirish bo‘yicha sinov tajribasi o‘tkazilgan edi. Unda 70 dan ortiq kompaniya ishtirok etgan. Ularning 86 foizi 4 kunlik ish haftasini joriy qilishga qaror qilgan.
Loyiha ishlab chiquvchilarining ta’kidlashicha, ish haftasining qisqarishi xodimlarning ruhiy salomatligiga tushadigan yukni kamaytiradi, ularni yanada sifatliroq ishlashga undaydi va ish beruvchilarga bunday shartlarga rozi bo‘ladigan yangi xodimlarni yollash osonroq kechadi.
Faollar va ayrim iqtisodchilarning fikricha, to‘rt kunlik ish haftasi xodimlarga foyda keltirishi, jumladan, ularning ruhiy salomatligiga tushadigan yukni kamaytirishi, korxonalarga esa xodimlar motivatsiyasini oshirish va kadrlarni ishga qabul qilish hamda ushlab qolish jarayonini osonlashtirishi mumkin.
Boston kolleji tadqiqotchilari so‘nggi sinov natijalari xodimlar uchun “g‘oyat ijobiy” bo‘lganini ma’lum qilishdi. Ular 89 kishi o‘rtasida o‘tkazilgan so‘rovga ko‘ra, xodimlarning 62 foizi sinov paytida kamroq toliqish his qilganlarini aniqladi. So‘ralganlarning 45 foizi esa o‘zlarini “hayotdan ko‘proq mamnun” his qilganlarini aytishgan.
Izoh (0)