Italiyaning “Roma” klubida harakat qiladigan o‘zbekistonlik hujumchi Eldor Shomurodov yozgi transfer oynasi vaqtida rimliklar safini tark etishga yaqin turibdi. Romapress nashrining xabariga ko‘ra, Italiyaning “Kremoneze” klubi futbolchi borasida muzokara boshlab yubordi.
Manbaga ko‘ra, Kremon klubi “Roma”ga Shomurodov bo‘yicha rasmiy taklif yuborgan. “Bo‘rilar” esa hujumchi uchun 8 million yevro so‘ramoqda. Garchi unga Fransiya va Turkiya klublardan boshqa takliflar bo‘lgan bo‘lsa-da, Shomurodov A Seriyada qolishni afzal ko‘rmoqda. “Kremoneze” mazkur vaziyatdan foydalanib qolib, Eldorni o‘z safiga qo‘shib olishni maqsad qilgan.
Ma’lumot uchun, avvalroq OAVda Shomurodovga Turkiyaning “Bashakshehir” klubi jiddiy qiziqish bildirgani hamda o‘zbekistonlik hujumchi istanbulliklar bilan shartnoma imzolash uchun Turkiyaga uchib borgani borasida mish-mishlar tarqalgan edi. Shuningdek, Fransiyaning “Renn” klubi ham Eldor atrofidagi vaziyatlarni kuzatib bormoqda.
Izoh (0)