Юлдузлар иштирокидаги реклама ҳар доим даромад ва машҳурлик келтирадигандек туюлади, аммо бу ҳар доим ҳам шундай бўлавермайди. Бугун биз брендлар учун муаммолар келтирган реклама лойиҳаларини эсга оламиз. Реклама брендлар ҳаётининг муҳим қисмидир. Маҳсулот, сюжет, визуал, таниқли шахс — рекламанинг ҳар бир жиҳати майда-чуйдасигача пухта ўйланади. Бироқ баъзида Pepsi ва Nivea каби йирик компанияларда ҳам муваффақиятсизликлар юз беради. Машҳур компаниялар тарихида “доғ” қолдирган шов-шувли реклама акциялари тўпламини тайёрладик.

Кендалл Женнер ва Pepsi рекламаси

Кендалл Женнер иштирокидаги Pepsi реклама ролиги 2017 йилда эфирга узатилди ва дарҳол танқидлар тўфонига учради. Рекламада модел суратга олинаётган бўлса, орқа фонда ирқий тенгсизликка қарши кўча намойиши кўрсатилади. Женнер суратга олишни тўхтатиб, фаолларга қўшилади. У ҳамма билан бирга Pepsi ичади, охирида эса полициячига ичимлик узатади — у жилмаяди, бахтли якун, ҳамма рақсга тушади.

Компания инқилобий образлардан фойдаланиб пул ишлашда ва ижтимоий муаммоларни соддалаштиришда айбланди. “Дунёни бир банка ширин газли ичимлик билан қутқариб бўлмайди,” деб ёзишди ижтимоий тармоқларда.

Дастлаб Pepsi вакиллари ўзларини ҳимоя қилишга уринишди, бироқ кейинчалик хатоларини тан олишди. “Шубҳасиз, биз хато қилдик ва бунинг учун узр сўраймиз,” дейишди улар. Ролик олиб ташланди ва унинг тарқатилиши тўхтатилди. Кендалл изоҳ бермади, лекин реклама кампанияси ҳақидаги барча постларини ўчириб ташлади.

Гал Гадот ва Huawei

2019 йилда Huawei Гал Гадот билан ҳамкорликда реклама тақдим этди. Ранг-баранг ролик Huawei П30 смартфонларининг янги модели афзалликларини намойиш қилди. Ҳаммаси яхши эди, бироқ актриса кампаниянинг промо-твитларини... iPhone орқали жойлади.

Бу нозик жиҳатга бир ёутубер эътибор қаратди. У рекламанинг скриншотини “Гал Гадот Huawei рекламасида... аммо iPhone билан ёзади. Қандай ажойиб...” деган изоҳ билан жойлади. Асл пост тезда ўчирилди, аммо скриншот тармоқ бўйлаб тарқалиб кетди — компаниянинг обрўсига путур етди.

Эмма Watson ва Burberry

2010 йилда Эмма Burberry баҳор-ёз коллекциясининг юз тимсолига айланди. “Гарри Поттер” юлдузи машҳур фотограф Марио Тестино билан ишлади — бу суратга олиш тарихга кириши мумкин эди. Бироқ кадрлардан бирида Эмманинг оёғи йўқолиб қолди. Фотомуҳаррирнинг хатосини пайқашмади ва суратни рекламага ўтказиб юборишди.

Кадр интернетда тарқалиб, кўплаб кинояли саволларга сабаб бўлди. Аммо на Watson, на Марио бу ҳақда ҳеч қандай изоҳ беришди. Бунинг ўрнига Эмма суратга олиш жараёнидан олган таассуротлари ҳақида видео пост жойлади. Burberry ҳам ҳеч қандай изоҳ бермади, кадрни ўчириб ташламади — уни ҳозир ҳам интернетда топиш мумкин.

Риҳанна ва Nivea

Nivea нинг Риҳанна билан ҳамкорлиги ижобий тарзда бошланди. Поп-юлдуз 2011 йилда бренд юз тимсолига айланди — компания унинг турнесига ҳомийлик қилди ва “Cалифорниа Кинг Бед” қўшиғини ўз рекламасида қўллади. “Риҳанна бизни қўллаб-қувватлаётганидан хурсандмиз,“ — деди Nivea вакили Маркус Пингер.

Бироқ бир йил ўтар-ўтмас хонандани... ҳаддан ташқари ҳайратомуз хатти-ҳаракат сабабли ишдан бўшатишди. Бренднинг янги раҳбари Стефан Ҳайденрайх Рианнани “жуда ҳам жозибадор” деб топди ва унинг ҳаёт тарзи Nivea учун мос келмаслигини таъкидлади. “Nivea қандай қилиб у билан боғланиши мумкинлигини тушунмаяпман,” деди у.

Рианна сукут сақлади, аммо ўз ижтимоий тармоқларидаги саҳифаларида Стефаннинг суратини “изоҳ шарт эмас” деган кинояли шарҳ билан жойлади.

Машҳур шахс билан ҳамкорлик қилиш ҳали муваффақият кафолати эмас. Брендлар таниқли инсонларга эътибор қаратишади, бироқ реклама кампанияси барибир кутилганидек бўлмай қолиши мумкин. Нозик жиҳатлар кўп: гоҳ фотошопнинг меъёрдан ошиши, гоҳ ўринсиз эпатажилик ёки ижтимоий муаммолар заминидаги жанжаллар туфайли, реклама ютуқларидан завқланиш ўрнига тушунтириш бериш ва узр сўрашга тўғри келади.